गाेरखामा पहिराेबाट पुरिएकाहरुकाे खाेजतलास गर्दै नेपाल प्रहरी
काठमाण्डौं । देशको विभिन्न स्थानमा आएको बाढी पहिरो र डुवानमा परी ११६ जनाले ज्यान गुमाएका छन् । अविरल वर्षाको कारण देशका विभिन्न स्थानमा आएको बाढीपहिरो र डुबानमा परी गत जेठ ३० गतेदेखि भाद्र १८ गते शुक्रबार दिउँसोसम्म ११६ जनाको ज्यान गएको प्रहरी प्रधान कार्यालयले जनाएको छ ।
ज्यान गुमाउनेहुनेहरूमा ५३ जना पुरुष, ३४ जना महिला, १३ जना बालक र १६ जना बालिका रहेको प्रधान कार्यालयले जनाएको छ ।
बाढीपहिरो र डुबानमा परी उक्त अवधिमा १३६ जना घाइते भएका छन् । तीमध्ये ६८ जना पुरुष, ३७ जना महिला, २० जना बालक र ११ जना बालिका रहेका छन् । घाइतेहरूलाई स्थानीय अस्पतालमा उपचार गरिएको छ ।
साथै बाढीपहिरोमा परी ३१ जना बेपत्ता भएका छन् । तीमध्ये १९ जना पुरुष, ६ जना महिला, ५ जना बालक र १ जना बालिका रहेका छन् । वेपत्ताको खोजी कार्य जारी छ ।
बाढीपहिरोमा परेका १ हजार २८९ जनाको विभिन्न ठाउँबाट उद्दार गरि उनीहरुलाई तत्काल उपचारका लागि विभिन्न अस्पतालमा लगिएको थियो ।
पर्वतको पहिरोमा परी ज्यान गुमाएकाहरु
बाढीको कारण ३ हजार १८२ वटा घर डुबानमा परेका छन् । ९७८ वटा घर, १६४ वटा गोठ, ६६ वटा पुल, ८ वटा विद्यालय र १५ वटा सरकारी कार्यालयमा क्षति पुगेको छ ।
सोही अवधिमा १ हजार ३०३ वटा पशु चौपायको समेत ज्यान गएको प्रधान कार्यालयले जनाएको छ ।
उक्त अवधिमा भएका जम्मा १ हजार ३४५ वटा विपद्का घटनाबाट १ हजार २६९ वटा घर परिवारका ६ हजार १११ जना मानिस विस्थापित भएका छन् ।
घटनाबाट प्रभावित भएका स्थानहरुमा भएको क्षति न्यूनीकरण र उद्दारमा प्रहरी कर्मचारीहरु सक्रिय रुपमा संलग्न रहेको भन्दै बाढी पहिरोको जोखिममा रहेका विभिन्न जिल्लाका घर परिवारलाई सुरक्षित स्थानमा राख्ने, पहिरोमा पुरिएका धनमाल निकालेर सुरक्षा गर्ने काम प्रहरीले गरिरहेको प्रहरी प्रधान कार्यालयले जनाएको छ ।
