साँकेतिक तस्विर
पर्वत । पर्वतको विभिन्न स्थानमा गएको पहिरोमा परी १० जनाले ज्यान गुमाएका छन् भने १ जना अझै बेपत्ता छन् ।
बिहीबार राती देखी परेको अबिरल बर्षाका कारण जिल्लाको विभिन्न स्थानमा गएको पहिरोका कारण १० जनाको ज्यान गएको हो ।
पहिरो गएको स्थानमा अहिले पनि प्रहरी उद्वारमा नै लागि रहेको पर्वत प्रहरीले जानकारी दिएको छ ।
पहिरोका कारण ज्यान गुमाउनेहरुमा कुश्मा नगरपालिका ३ दुुर्लुङको भोगेनी भन्ने स्थानमा माधव शर्मा पौडेलको घर पुरिदा १६ बर्षिया छोरी बिमला पौडेल, ११ बर्षिया बिनिता पौडेल, ७५ बर्षिया आमा कौशिला पौडेल, ३५ बर्षिया श्रीमती भगवती पौडेल र ९ बर्षका छोरा बिनोद पौडेलको ज्यान गएको पर्वत प्रहरीले जानकारी दिएको छ ।
कुश्मा नगरपालिका ११ को सिल्मी बस्ने मनिलाल पौडेलको घर पुरीदा मोदी गाउँपालिका ७ राम्जा घरभई पौडेलका घरमा पाहुना आएका ३८ बर्षका दुर्गा पौडेल र निजकै छोरा बर्ष ६ का गणेश पौडेलको ज्यान गएको छ ।
पर्वतकै मोदी गाउँपालिका ५ अम्बोटेमा अबिरल बर्षा पछि ओखलढुङा सामुदायिक बनबाट खसेको पहिरोले स्थानिय फुलमायाँ थापाको घर बगाउदा ५० बर्षिया थापाको पनि ज्यान गएको प्रहरीले जनाएको छ ।
उता पर्वतको कुश्मा नगरपालिका ११ पपुवा पाल्चे स्थित हरि पौडेलको घर पहिरोले भत्किदा ३ जनाको ज्यान गएको छ । प्रहरी कार्यालयले दिएको जानकारी अनुसार घर भत्किदा पौडेलका ४० बर्षिया श्रीमती मायाकुमारी पौडेल र निजका ३ बर्षका छोरा प्रयुस पौडेलको ज्यान गएको छ ।
पौडेलका ७० बर्षिया आमा डल्ली पाध्या पौडेल भने बेपत्ता भएकी छिन । उनको प्रहरीले खोजी गरिरहेको पर्वत प्रहरीले जनाएको छ ।