काठमाण्डौँ । १० महिनाको तालिम संगै नेपाल प्रहरीका जवानहरुको आधारभूत तालिमबाछ ३ हजार बढी जवानहरु दीक्षित भएका छन् ।
राष्ट्रिय प्रहरी प्रशिक्षण प्रतिष्ठान महाराजगञ्ज, विभिन्न प्रदेश प्रहरी तालिम केन्द्र तथा गणहरुमा २०७७ मंसिर ३ गतेदेखि संचालित प्रहरी जवान आधारभूत तालिममा सहभागी ३ हजार ५७१ जना प्रहरी जवानहरु मंगलबार दीक्षित भएका हुन् ।
दीक्षित प्रहरी जवानहरु मध्ये ६५८ जना महिला र २ हजार ९१३ जना पुरुष रहेको प्रहरी प्रधान कार्यालयले जनाएको छ ।
केन्द्रीय प्रहरी बिशेष कार्यदल कपनको दीक्षान्त समारोहमा महानगरीय प्रहरी कार्यालय रानीपोखरीका प्रहरी नायव महानिरीक्षक उत्तमराज सुवेदीले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए ।
दीक्षान्त समारोहमा सशस्त्र प्रहरी गण नम्बर १ नक्सालका ९४ जना र केन्द्रीय प्रहरी बिशेष कार्यदल कपनका ९६ जना गरी जम्मा १९० जना प्रशिक्षार्थी दीक्षित भएका छन् ।
नेपाल प्रहरी शिक्षालय भरतपुरको दीक्षान्त समारोहमा प्रहरी प्रधान कार्यालय, प्रहरी महानिरीक्षकको सचिवालय नक्सालका प्रहरी नायव महानिरीक्षक बसन्तकुमार लामाले प्रशिक्षार्थीहरुलाई पुरस्कार तथा प्रमाणपत्र वितरण गरे । उक्त शिक्षालयबाट ८८ जना प्रशिक्षार्थीहरु दीक्षित भएका छन् ।
प्रहरी युक्ति तालिम महाविद्यालय जर्गाह नवलपरासीको दीक्षान्त समारोहमा राष्टिय प्रहरी प्रशिक्षण प्रतिष्ठान महाराजगंजका प्रहरी नायव महानिरीक्षक डा.देवबहादुर बोहराले प्रशिक्षार्थीहरुलाई पुरस्कार तथा प्रमाणपत्र वितरण गरेका थिए । उक्त महाविद्यालयबाट १६० जना प्रशिक्षार्थीहरु दीक्षित भएका छन् ।
त्यस्तै गरी १ नम्बर प्रदेश प्रहरी तालिम केन्द्र रानी बिराटनगरका ४८० जना, १ नम्बर प्रदेश सशस्त्र प्रहरी गण विराटनगरका ९६ जना र दंगा नियन्त्रण प्रहरी गण दुहवीका ९५ जना गरी जम्मा ६७१ जना प्रशिक्षार्थीहरु दीक्षित भएका छन् ।
उता २ नम्बर प्रदेश प्रहरी तालिम केन्द्र जनकपुर राजविराजबाट तालिम केन्द्रबाट १९४ जना, बागमती प्रदेश प्रहरी तालिम केन्द्र दुधौली सिन्धुलीतालिम केन्द्रबाट २०२ जना, बागमती प्रदेश दंगा नियन्त्रण प्रहरी गण हेटौंडाबाट गणबाट ४८ जना र बागमती प्रदेश सशस्त्र प्रहरी गण रातोमाटेबाट ४७ जना, गण्डकी प्रदेश प्रहरी तालिम केन्द्र पोखरातालिम केन्द्रबाट २१० जना प्रशिक्षार्थीहरु दीक्षित भएको प्रधान कार्यालयले जनाएको छ ।
त्यस्तै गरी लुम्बिनी प्रदेश प्रहरी तालिम केन्द्र बुटवलतालिम केन्द्रबाट ३९६ जना, लुम्बिनी प्रदेश दंगा नियन्त्रण प्रहरी गण सुनवल नवलपरासी गणबाट ९७ जना, कर्णाली प्रदेश प्रहरी तालिम केन्द्र सुर्खेतबाट ९८ जना, सुदूरपश्चिम प्रदेश प्रहरी तालिम केन्द्र दिपायल तालिम केन्द्रबाट ३९५ जना, साथै सुदूरपश्चिम प्रदेश तालिम केन्द्र दिपायल अन्तर्गत बुडर प्रशिक्षणस्थलबाट २११ जना र राष्ट्रिय प्रहरी प्रक्षिक्षण प्रतिष्ठान महाराजगंजको दीक्षान्त समारोहमा ५२ जना प्रशिक्षार्थीहरु दीक्षित भएका छन् ।
दीक्षान्त समारोहका प्रमुख अतिथिहरुले प्रहरी जवान आधारभूत तालिम सफलतापूर्वक सम्पन्न गरेका प्रशिक्षार्थीहरुलाई बधाई तथा सफलताको कामना व्यक्त गर्दै आवश्यक निर्देशनसमेत दिएका थिए ।
