पोखरा । पोखरामा बिना इजाजत एसिडको ओसार पसार र बेचबिखन गर्ने ३ जना पक्राउ परेका छन् ।
पोखरा महानगरपालिका ४ गैह्रापाटनस्थित ग. ३ च ११४३ नम्बरको जिपमा सिलबन्दी तथा लेवलिङ नलगाएको १ हजार केजी एसिड र सोही महानगरपालिका २ मौरिया टोलस्थित अभिषेक औजार पसलबाट सिलबन्दी र लेबलिङ नलगाई बेच्नको लागि राखेको ३५० केजी एसिड बरामद गरीएको कास्की प्रहरीले जनाएको छ ।
पक्राउ पर्नेहरुमा जिप चालक चितवन भरतपुर महानगरपालिका ४ बेलचोक बस्ने बारा जितपुर सिमरा उपमहानगरपालिका १५ स्थायी घर भएका १९ वर्षीय मिन बहादुर भारती, सोही जिपमा सवार चितवन भरतपुर महानगरपालिका २ बस्ने मोरङ बिराटनगर महानगरपालिका २ घर भएका २९ वर्षीय केशब सिंह र अभिषेक औजार पसलका संचालक पोखरा महानगरपालिका २ मोहोरिया टोल बस्ने बाग्लुङ, बाग्लुङ नगरपालिका ७ ढिकीचौर घर भएका ६३ वर्षीय बल बहादुर बिक रहेको प्रहरीले जानकारी दिएको छ ।
कास्कीमा बिना इजाजत एसिडको ओसार पसार तथा बेचबिखन भइरहेको भन्ने सूचनाको आधारमा जिल्ला प्रहरी कार्यालय कास्कीबाट खटिएको प्रहरीले निग्रानी तथा अनुगमन गर्ने क्रममा उक्त परिमाणको एसिड बरामद भएको हो ।
पक्राउ परेका सबैलाई तेजाब तथा अन्य घातक रासायनिक पदार्थ (नियमन) अध्यादेश, २०७७ बमोजिम मुद्दा दर्ता गरी थप अनुसन्धान प्रकृया अगाडि बढाइएको जिल्ला प्रहरी कार्यालय कास्कीले जनाएको छ ।