साँकेतिक तस्बिर
कावासोती । नवलपुरको हुप्सेकोटमा केही दिन देखी भएको अधिक बर्षा पछि पानी मुहान र पाइपलाइनलाई क्षति पुरयाए पछि खानेपानीको हाहाकार भएको छ ।
अविरल वर्षा पछि आएको बाढी पहिरोले खानेपानीको मुहान र पाईपलाईनमा क्षति पुर्याए पछि बिहिबार राती देखि हुप्सेकोटमा खानेपानीको हाहाकार मच्चिएको हो ।
खानेपानीको मुख्य मुहानहरु गिरुवारी खोला, बेतही खोला, सोति खोला र पत्थर खोलाको मुहानमा २ दर्जन भन्दा बढी स्थानमा पहिरो गए पछि खानेपानी वितरण पुर्ण रुपमा बन्द भएको देउराली हुप्सेकोट शहरी खानेपानी तथा सरसफाइ उपभोक्ता संस्थाले जनाएको छ ।
संस्थाका अध्यक्ष मेकबहादुर पुलामीका अनुसार धेरै स्थानमा खानेपानीको पाईपलाइन बाढिले बगाएको र
लगातार पानी परेकोले मुहानमा समेत क्षति पुगेको छ । पानी नरोकिदासम्म पाइपलाइन मर्मत गर्न नसकिने अध्यक्ष पुलामीले बताए ।
पानीको आपूर्ति बन्द भए संगै ३ हजार घरधुरी प्रत्यक्ष प्रभावित भएका छन् । तत्कालकालागि संस्थाले ३ वटा टयाङकरको ब्यवस्था गरेको र खानेपानी वितरणको तयारी गरिएको हुप्सेकोट शहरी खानेपानी तथा सरसफाइ उपभोक्ता संस्थाले जनाएको छ ।
खानेपानी अवरुद्ध भएपछि आकाशे पानीले भाडाकुडा र कपडा धुने काम गरिरहेको र बजारमा पाउने पानी किनेर काम चलाउनु परेको एक स्थानियले बताए ।
