काठमाण्डौं । केही साता यता देखी अण्डाको भाउ आकाशिएको छ । उत्पादकहरुले एकलौटी मूल्य निर्धारण गरेको र अनुगमनको पाटो नहुदा अहिले अण्डा नेपाली ईतिहासमा नै महंगो भएको हो ।
२ महिनाको अवधिमा अण्डाको उपभोक्ता मूल्य भन्दा झण्डै दोब्बरले वृद्धि भएको छ । ३ साता अगाडी प्रति गोटा १२ रुपैयाँमा बिक्री भइरहेको अण्डाको मूल्य आज बजारमा २० रुपैयाँ पुगेको छ ।
कुखुराको अण्डाको मूल्य हालसम्मकै उच्च भएको नेपाल अण्डा उत्पादक संघले जनाएको छ । ३ साताअघि प्रतिक्रेट ३६५ रुपैयाँमा कारोबार भएको अण्डाको मूल्य आज ४२० रुपैयाँ पुगेको संघका अध्यक्ष शिवराम केसीले बताए ।
‘कोरोनाका कारण विगतमा भन्दा अण्डाको माग अत्याधिक भएकोले बजारमा अण्डाको भाउ बढे अध्यक्ष केसीले बताए । केसीका अनुसार दानाको भाउ बृद्वि पनि अण्डाको भाउ माथि गएको उनले धारणा राखे ।
संघका अनुसार तोकेको मूल्य भन्दा ५ रुपैयाँ कम किसानले पाउने भएकाले मूल्य बढ्दा प्रत्यक्ष रुपमा किसानलाई बढी फाइदा पुगेको छ ।
बजारमा भने ५० किलो दानाको बिक्री मूल्य ३ हजार ७०० रुपैयाँ रहेको र उक्त मूल्य पछिल्लो ३ महिनादेखि स्थिर रहेको छ ।
यता नेपाल खुद्रा व्यापार संघका अनुसार काठमाण्डौं उपत्यका वितरकले १ महिनामा अण्डाको मूल्य बाक्सामा ८०० रुपैयाँसम्मले बढाएका छन् । एक महिनाअघि ठूलो अण्डा प्रतिबाक्सा २ हजार ५०० रुपैयाँमा बिक्री हुने गरेकोमा अहिले कम्तिमा ३ हजार ५० रुपैयाँदेखि ३ हजार ३०० रुपैयाँसम्म पुगेको जनाएको छ ।
