बुटवल । लुम्बिनी प्रदेशका मुख्यमन्त्रीमा माओवादी केन्द्र संसदीय दलका नेता कुलप्रसाद केसी नियुक्त भएका छन् । केसीलाई प्रदेश प्रमुख अमिक शेरचनले आज मुख्यमन्त्री नियुक्त गरेका हुन् ।
एमाले नेता शंकर पोखरेलले बुधबार पदबाट राजीनामा दिएपछि बिहीबार नेपाली कांग्रेस, माओवादी केन्द्र, जनता समाजवादी पार्टी र राष्ट्रिय जनमोर्चाको गठबन्धनले केसीको नेतृत्वमा नयाँ सरकारका लागि दाबी पेश गरेका थिए ।
प्रदेश प्रमुख शेरचनले केसीलाई आजै मुख्यमन्त्रीमा नियुक्त गर्ने र शपथ गराउने तयारी रहेको छ । गठबन्धनले आजै सानो आकारको मन्त्रिमण्डल गठन गर्ने तयारी गरेको छ ।
४ बिना विभागिय र २ कार्यालयगत मन्त्रालयको जिम्मेवारी सहित ६ मन्त्रीले पदभार ग्रहण गर्न लागेका हुन् ।
केसीको मन्त्री मण्डलमा नेपाली कांग्रेसबाट डिल्लीबहादुर चौधरी ग्रामीण विकास मन्त्री, जनता समाजवादी पार्टी जसपाबाट सहसराम यादवलाई भौतिक पूर्वाधार विकास मन्त्रीको जिम्मेवारी पाउने भएका छन् ।
माओवादी केन्द्रका कृष्णध्वज खड्का, सूर्य चिह्नबाट निर्वाचन जितेका अजय शाही, जसपाका पुर्मती ढेंगा र सुमन शर्मा रायमाझीले बिना विभागिय मन्त्रीको रुपमा नियुक्त हुँदैछन् ।
विश्वासको मत लिएसँगै बाँकी मन्त्रिपरिषद् विस्तार हुने गठबन्धन स्रोतले बताएको छ ।
