पोखरा । नेपाल आदिवासी जनजाति पत्रकार महासंघ (फोनिज), गण्डकीद्वारा सञ्चालित ‘कञ्चन पत्रकारिता पुरस्कार–२०७८’ केबी रानामगर (नवलपुर) र शान्ति गुरुङ (कास्की)लाई प्रदान गरिने भएको छ ।
प्रतिभा छनोट समितिले गरेको सिफारिसअनुसार महासंघको मंगलबारको बैठकले नाम अनुमोदन गरेको अध्यक्ष एमबी आस्थाले जानकारी दिए । पुरस्कार राशि जनही २५ हजार र सम्मानपत्र छ ।
अधिवक्ता सुरेन्द्र थापामगर संयोजक समितिको प्रतिभा छनोट समिति सदस्यमा अधिवक्ता जूनाकुमारी गुरुङ, पत्रकार हुम गुरुङ तथा एमबी आस्था र रुद्र श्रीषमगर थिए ।
पुरस्कृत हुने गुरुङ रेडियो नेपाल प्रादेशिक प्रशारण केन्द्र पोखरामा कार्यरत छिन् भने मगर नवलपुरको देवचुली टिभीमा काम गर्छन् ।
उनीहरुलाई साउन २७ मा पोखरामा हुने समारोह पुरस्कृत गरिने फोनिजले जनाएको छ ।
पोखराका प्रतिष्ठित व्यवसायी बिमलमान गुभाजु र उनका परिवारले आफ्ना बावुआमा वेदमान गुभाजु र नेत्रकुमारी गुभाजुको स्मृतिमा सो पुरस्कार स्थापना गरेका हुन् ।
गण्डकी प्रदेशलाई कार्यक्षेत्र बनाई क्रियाशील २ पत्रकारलाई हरेक वर्ष सो पुरस्कार प्रदान गरिँदै आएको छ । यसअघि बागलुङका राजेन्द्रमान राजभण्डारी र कास्कीका रुद्रबहादुर थापालाई सो पुरस्कार प्रदान गरिएको थियो ।
