खोटाङ । भरुवा बन्दुकसहित दिक्तेलमा वडा सदस्यसहित ३ जनालाई प्रहरीले पक्राउ गरेको छ ।
दिक्तेल रुपाकोट मझुवागढी नगरपालिका १० पाथेकाका वडा सदस्यसहित ३ जनालाई प्रहरीले पक्राउ गरेको हो ।
घरमा अवैधरूपमा हातहतियार लुकाएर राखेको भनी स्थानीयको सूचनाको आधारमा वडा सदस्य परशुराम बानियाँसहित ३ जनाको घरमा खानतलासी गर्दा केही हातहतियार फेला परेकोले उनीहरुलाई पक्राउ गरिएको खोटाङ प्रहरीले जनाएको छ ।
पक्राउ पर्ने ६९ वर्षीय मदनबहादुर बानियाँ र ३३ वर्षीय मिलन बानियाँ रहेको प्रहरीले जनाएको छ ।
पक्राउ परेका वडा सदस्यसहित तीनै जनाविरुद्ध अवैध हातहतियार तथा खरखजनासम्बन्धी मुद्दा दर्ता गरी हिरासतमा राखेर कारवाहीको प्रक्रिया शुरु गरिएको जिल्ला प्रहरी कार्यालय खोटाङका प्रवक्ता प्रहरी निरीक्षक सागर साहले बताए ।
पक्राउ परेका वडा सदस्य परशुरामको घरबाट लोड नगरेको १ थान भरुवा बन्दुक तथा मदनबहादुरको घरबाट छर्रा र बारुदसमेत लोड गरेको १ थान भरुवा बन्दुक र त्यसमा प्रयोग हुने १५० ग्राम बारुद, ४०० ग्राम धातुका छर्रा र सलाई तथा मिलनको घरबाट छर्रा, बारुद लोड गरेको १ थान भरुवा बन्दुक बरामद गरिएको प्रहरीले जनाएको छ ।
पक्राउ परेको तिनै जनालाई जिल्ला अदालत खोटाङबाट ७ दिनको म्याद थप गरी अवैध हातहतियार तथा खरखजाना मुद्वामा थप अनुसन्धान शुरु गरिएको जिल्ला प्रहरी कार्यालय खोटाङका प्रमुख प्रहरी प्रहरी नायब उपरीक्षक उमेश लम्सालले बताए ।
