पोखरा । मनाङ मस्र्याङदी क्लवले पोखरा रंगशाला प्रयोग गर्न पाउनु पर्ने माग गरेको छ ।
आसन्न ए डिभिजन लिगका लागि मनाङ मस्र्याङदी क्लवले पोखरा रंगशाला प्रयोग गर्न पाउनुपर्ने माग गरे संगै सरोकारवाला छलफलले रंगशाला प्रयोगकालागि सिफारिस समेत गरेका छन् ।
अखिल नेपाल फुटबल संघ एन्फाका अध्यक्ष कर्माछिरिङ शेर्पा र राखेपका बोर्ड सदस्य राजेश गुरुङसहित रंगशालाका सरोकार ब्यक्तिहरु विच पोखरामा भएको छलफलमा पोखरा रंगशालालाई मनाङले प्रयोग गर्न पाउनेमा सहमति भएको छ ।
घरेलु लिगको सर्वाधिक सफल क्लव मनाङको घरेलु मैदानका रुपमा पोखरा रंगशालालाई प्रयोग गर्न सिफारिस गरिएको हो ।
साथै मनाङको घरेलु मैदान पोखरा रंगशाला भनेर प्रमाणपत्र दिनका लागि पनि राखेपलाई सिफारिस गरिने भएको छ । राखेपले गण्डकी प्रदेशको पुर्वाधार हेर्ने जिम्मा दिएको छ ।
यता मनाङले पनि पोखरालाई आफ्नो घरेलु मैदान बनाउने कुरामा सकारात्मक रुपमा लिएको छ ।
असोजमा हुने भनिएको ए डिभिजन लिग अगाडी यदि राखेपले मनाङलाई सो मैदान दिने निर्णय गरेको खण्डमा मनाङले आफ्नो होम गेम पोखरा रंगशालामा खेल्नेछ । यसका साथै अरु फुटबल गतिविधी पनि सोहि मैदानमा गर्न पाउने छ ।