काठमाण्डौं । जापानको राजधानी टोकियोमा भइरहेको ३२औँ ग्रीष्मकालीन ओलम्पिक खेलकूदमा नेपाली सुटिङ खेलाडी कल्पना परियारले राष्ट्रिय कीर्तिमान बनाउन सफल भएकी छिन् ।
परियारले महिला १० मिटर एयर राइफल प्रतिस्पर्धाअन्तर्गत भएको खेलमा ६१६.८ अङ्क बनाउँदै राष्ट्रिय कीर्तिमान बनाएकी हुन् ।
उनले पहिलो सिरिजमा १०२.२, दोस्रोमा १०५.४, तेस्रोमा १०१, चौथोमा १०४.१, पाँचौँमा १०३.४ तथा छैटौँ सिरिजमा १००.७ अङ्क जोडेकी थिईन ।
परियारले यसअघि नेपालमा भएको १३औँ दक्षिण एशियाली खेलकूदमा ६१४.५ अङ्क बनाउएकी थिइन । त्यो बेला पनि परियारले महिला १० मिटर एयर राइफलतर्फ राष्ट्रिय कीर्तिमान बनाउन सफल भएकी थिइन ।
परियार टोकियो ओलम्पिकमा छनोट चरणमा ५० खेलाडीमध्ये ४६औँ स्थानमा रहदै प्रतियोगिताबाट बाहिरिकी छिन् ।
परियारले प्रतिस्पर्धा गरेको समूहबाट आठ खेलाडी फाइनल चरणमा प्रवेश गरेका छन् । नेपाली सेनाको त्रिभुवन आर्मी क्लबकी खेलाडी उनी वाइल्ड कार्ड प्राप्त गर्दै ओलम्पिकमा छनोट भएका थिए ।
सो समूहमा नर्वेकी खेलाडी ६३२.९ अङ्कका साथ पहिलो, कोरियन खेलाडी ६३१.७ अङ्कसहित दोस्रो तथा अमेरिकी खेलाडी ६३१.४ अङ्कका साथ तेस्रो भएको छ ।
टोकियो ओलम्पिकमा अब पौडीका गौरिका सिंह र एलेक्स शाह, एथलेटिक्सकी सरस्वती चौधरी तथा जुडोकी सोनिया भट्टले प्रतिस्पर्धा गर्न बाँकी नै छ ।