काठमाण्डौं । प्रधानमन्त्री शेरबहादुर देउवाले प्रतिनिधिसभाबाट विश्वासको मत प्राप्त गरेका छन् ।
आइतबार राति भएको मतदानमा देउवाले प्रतिनिधि सभाबाट विश्वासको मत प्राप्त गरेका हुन् । मतदानमा सहभागी भएका २४९ सांसदमध्ये देउवाको पक्षमा १६५, विपक्षमा ८३ र १ मत तटस्थमा परेको छ ।
सभामुख अग्नि सापकोटाले प्रतिनिधि सभामा भएको मत विभाजनमार्फत भएको मतदानमा देउवाले बहुमत प्राप्त गरेको घोषणा गरेका हुन् ।
प्रधानमन्त्री देउवाको पक्षमा काँग्रेससहित माओवादी केन्द्र, जसपाका दुवै पक्ष र राष्ट्रिय जनमोर्चाका सांसदले मतदान गरेका थिए ।
एमालेका माधव नेपालसहित २२ सांसदले फ्लोरक्रस गर्दै देउवाको पक्षमा मतदान गरेका थिए ।
त्यस्तै प्रस्तावको विपक्षमा एमालेका सांसदले मतदान गरे ।
बैठकमा अनुपस्थित भएका प्रधानमन्त्री ओली पनि देउवाको विपक्षमा मतदान गर्न भने सहभागी भएका थिए ।
यता ओली पक्षकै सांसदहरू प्रेम आले, किसान श्रेष्ठ, गोपाल बम, धनबहादुर बुढा, हिराचन्द्र केसी लगायतका सांसदले भने देउवाको पक्षमा मतदान गरेका छन् ।
सर्वोच्च अदालतमा रिट दायर गर्ने बेलामा देउवाको पक्षमा हस्ताक्षर गरेका एमाले नेता घनश्याम भुसाल, सुरेन्द्र पाण्डे, गोकर्ण विष्ट लगायतले भने देउवालाई मतदान गरेनन् ।
एक सिट रहेको राप्रपा तटस्थ बस्यो । विश्वासको मत पाएसँगै देउवा सरकारको सुनिश्चितता कायम भएको छ ।
