गोरखा – गोरखाको एक सहकारीबाट गएराती ३२ लाख रुपैयाँ चोरी भएको छ । जिल्लाको भिमसेन थापा गाउँपालिका ७ को बोर्लाङ्गमा रहेको भिमकुल बचत तथा ऋण सहकारी संस्था लि.बाट गएराती चोरी भएको जिल्ला प्रहरी कार्यालय गोरखाले पुष्टी गरेको हो ।
रातीको समयमा आएका चोरहरुले कार्यालयको मुख्य च्यानल गेट फुटाएर भित्र पसी नगद चोरी भएको सहकारीका संञ्चालक समितिका सदस्य बुद्धि श्रेष्ठले जानकारी दिए ।
सहकारीले बैकिङ कारोबार भएको ५२ लाख रुपैया मध्ये ३२ लाख रुपैयाँ मात्र चोरहरुले चोरी गरेको श्रेष्ठले बताए । शुक्रबार बेलुकीसम्म जम्मा भएका नगद आइतबार सदरमुकाम स्थित बैंकमा जम्मा गर्ने तयारी भई रहदा चोरी भएको सहकारीले जनाएको छ ।
सिसिटिभी फुटेजमा चोरी गर्न आएका ब्यत्तिहरुले ताल्चा फुटाउन प्रयोग गरिने सामग्री समेत बोकेर आएको स्पष्ट देखिएको छ ।
सहकारीका कार्यरत लेखपाल सनिबार बिहान कार्यालयमा पुग्दा च्यानल गेट फुटाएको देखे पछि हो हल्ला गरिएको थियो । चोरहरुले राती करिब ३ बजेको समयमा चोरी गरेको सिसिटिभीको फुटेजमा सहजै देखिएको सहकारीले जनाएको छ । सिसीटिभी फुटेजमा २ जना व्यक्ति देखिएको छ ।
चोरीको घटना जानकारी पाए लगत्तै गोरखा प्रहरी घटनास्थलमा पुगेर अनुसन्धान थालेको जिल्ला प्रहरी कार्यालय गोरखाका प्रहरी उपरीक्षक शेखर खनालले बताए । अहिले प्रहरीले सादा पोसाकमा ठुलो संख्यामा प्रहरी परिचालन गरेको छ ।
भिमकुल बचत तथा ऋण सहकारी संस्था लि.जिल्लाकै उत्कृष्ट सहकारी मध्येको एक हो ।
