काठमाण्डौ – नेकपा एमाले अध्यक्ष एवं प्रधानमन्त्री केपी ओलीले पार्टीका वरिष्ठ नेता माधव नेपाल पक्षलाई कांग्रेस सभापति शेरबहादुर देउवालाई प्रधानमन्त्री बनाउन गरेको हस्ताक्षर फिर्ता लिन दिएको समयसीमा सकिएको छ ।
ओलीले पछिल्लो पटकको आफू पक्षीय केन्द्रीय कमिटी बैठकमार्फत वरिष्ठ नेता माधवकुमार नेपाल पक्षका २३ जना नेताहरुलाई हस्ताक्षर फिर्ताका लागि सोमबार साँझ ५ बजेसम्मको समयसीमा दिएका थिए ।
आफूले दिएको समयसीमाभित्र नेपाल पक्षले हस्ताक्षर फिर्ता नलिए पार्टी एकताको आधार नबन्ने घोषणा गरेका ओलीले पुनः नेकपा एमालेको एकताका लागि संयुक्त मस्यौदा तायर पार्ने विषयमा यसअघि गठित कार्यदल ब्यूत्याएर छलफल शुरू भएको छ ।
सहमतिको मस्यौदाका लागि यसअघि अध्यक्ष केपी ओली र वरिष्ठ नेता माधवकुमार नेपालबीचको सहमति अनुसार गठित कार्यदलको औपचारिक बैठक अहिले सिंहदरबारमा जारी छ । एकताका लागि केही सकारात्मक प्रगतिपछि कार्यदल ब्युँताइएको हो ।
कार्यदलमा ओली पक्षका संयोजक सुवास नेम्वाङ छन् भने माधव नेपाल पक्षका संयोजक भीम रावल छन् ।
भीम रावलले आइतबार राति अध्यक्ष ओलीसँग भेटेपछि कार्यदल ब्युँतिएको हो । कार्यदलमा ओली पक्षबाट नेम्वाङसहित विष्णु पौडेल, शंकर पोखरेल र प्रदीप ज्ञवाली छन् भने नेपाल पक्षबाट संयोजक भीम रावलसहित घनश्याम भुसाल, सुरेन्द्र पाण्डे र गोकर्ण विष्ट छन् ।
