काठमाण्डौं – साेमबार राती भएको अर्जेन्टिना र बोलिभिया बिचको खेलमा अर्जेन्टिनाले ४–१ गोलको अन्तरले जित हात पारेको छ । लियोनल मेसीको २ गोलमा कोपा अमेरिकामा अर्जेन्टिनाले समूह ‘ए’ को आफ्नो अन्तिम लिग खेलमा बोलिभियालाई ४–१ ले हराएको हो । अर्को खेलमा उरुग्वेले पाराग्वेलाई १–० ले पराजित गर्यो ।
अर्जेन्टिनाले एलेजान्ड्रो गोमेजको गोलले अग्रता लिएयता मेसीले २ गोल थपे । मेसीले खेलको ३३औं मिनेटमा पेनाल्टीमार्फत पहिलो गोल गरेका थिए । त्यस्तै ४२औं मिनेटमा उनले व्यक्तिगत दोस्रो गोल गरेका थिए ।
एरविन साभेड्राले बोलिभियाका लागि १ गोल फर्काएपछि अर्जेन्टिनाका लागि लउटारो मार्टिनेजले चौथो गोल गरे ।
उरुग्वेको जितमा भने एडिसन कभानीले पेनाल्टीबाट १ मात्र गोल गरे । लिग चरणको समाप्तिमा अर्जेन्टिना १० अंकसहित शीर्ष स्थानमा छ । यो समूहबाट उरुग्वे, पाराग्वे र चिलीले पनि अन्तिम ८ मा प्रवेश पाएका छन् ।
