काठमाण्डौँ – उपत्यकामा भालीदेखि सार्वजनिक यात्रुवाहक सवारीसाधन जोर बिजोर प्रणालीमा सञ्चालन गरिने भएको छ ।
स्वास्थ्य मापदण्डको पूर्ण पालना गर्दै र भौतिक दूरी कायम हुने गरी २५ सिट क्षमता सम्म भएका सवारीसाधन सञ्चालन गर्नपाईने जिल्ला प्रशासन कार्यालय काठमाण्डौँले जारी विज्ञप्तिमा भनिएको छ ।
चालक, सहचालक तथा यात्रुले अनिवार्य मास्क लगाउने, सवारी साधनको ढोकामा स्यनिटाइजरको व्यवस्था हुनुपर्ने नियम समेत बनाईएको छ । त्यस्तै सहचालकले पञ्जा लगाउनुपर्ने र अनिवार्य रुपमा सवारीसाधन निसङ्क्रमित गर्नुपर्ने छ । सवारीसाधन बिहान ६ः०० देखि साँझ ७ः०० बजेसम्म मात्र सञ्चालन गर्न पाइने छ ।
निजी सवारीसाधन (कार जिप, भ्यान) मा बढीमा ४ जना र ट्याक्सीको हकमा बढीमा ३ जना मात्रै सवार गर्न पाउने नियम बनाईएको छ । मोटरसाइकल र स्कुटरसमेत जोर बिजोर प्रणाली लागू गरिएको छ । आइतबार, मंगलबार, बिहीबार र सनिबार बिजोर नम्बरको र अन्य बार जोर नम्बरको सवारी साधान चल्न पाउने छ ।
स्वास्थ्यकर्मी, पशु स्वास्थ्यकर्मी, एम्बुलेन्स, खानेपानी, विद्युत् मर्मत सम्भारका सवारी साधनले स्वास्थ्य मापदण्ड पालना गरी निर्बाध रुपमा सञ्चालन हुन पाउने बताइएको छ ।
अत्यावश्यक सेवा जस्तै एम्बुलेन्स, खानेपानी, विद्युत् मर्मत सम्भार, स्वास्थ्य सम्बद्ध (औषधि, अक्सिजन सिलिन्डर), दूरसञ्चार इन्टरनेट मर्मत, कार्गो, कुरियर तथा डाँक सेवा र फोहोर मैला व्यवस्थापनसम्बन्धी ढुवानीका साधनमा ब्यानर वा प्रिन्टमा विषय उल्लेख गरी निर्बाध रुपमा सञ्चालन गर्न पाइने छ ।
आउनुहोस हामी पनि हेरौं न त के के गर्न पाइन्छ के के गर्न पाइन्न ?
