गोरखा – गोरखाको सिरानचोक गाउँपालिकामा कोरोना रोकथामका लागि परामर्श शिविर सञ्चालन गरेको छ ।
नेकपा माओबादी केन्द्रद्धारा गठित कोभिड स्वास्थ्य इकाईले कोरोना संक्रमण विरुद्व परामर्श शिविर सञ्चालन गर्दै स्वास्थ्य सामग्री सहयोग गरेको संयोजक नवराज पुडासैनीले जनाएको छ ।
इकाईले संक्रमण फैलन नदिन कोभिड बारे सचेतना फैलाउन जिल्ला भित्रका सञ्चार माध्यममा सचेतना मूलक सामग्री प्रशारणसंगै विरामीहरुको परिक्षण, उपचार तथा उद्दारमा समेत मानिस परिचालन गरेको जनाएको छ ।
कोरोना महामारीबाट नागरिकहरुलाइ सुरक्षित राख्न इर्काले आफू बच्न र अरुलाई बचाउन समुदाय स्तरमा सचेतना फैलाउने उदेश्यले सार्वजनिक सन्देश बनाई सञ्चार माध्यमहरुमा प्रशारण गर्दै आएको संयोजक पुडासैनीले बताए ।
त्यस्तै गाउँपालिका भित्र कोभिड परिक्षण, उपचार तथा परामर्श शिविर संचालन गरी कोभिड संक्रमण पुष्टी भएकाहरुलाई औषधी र परामर्श प्रदान गरिएको पुडासैनीले जानकारी दिए । साथै इकाईले पालिका भित्रका होम आइसोलेसनमा बसेका ८७ जना बिरामीहरुलाई घरघरमा पुगेर पोषण तथा सरसफाई सामग्री समेत बितरण गरि सकेको छ ।
बितरण गरिएको सामग्रीमा प्रति बिरामी १० दखि १५ गोटा अण्डा, २ किलो गेडागुडी, १५ पिस सर्जिकल माक्स, सेनीटाजर तथा साबुन जस्ता स्वास्थ्य सामाग्री उपलब्ध गराइएको थियो । इकाईले पालिकाको ८ वटै वडामा संक्रमण फैलिएको तथा संक्रमणको जोखिममा रहेका बस्तीहरुमा माक्स लगाऔं, कोरोना भगाऔं अभियान संचालन प्रत्येक घरमा सर्जिकल मास्क समेत बितरण गरेको छ ।
