काठमाण्डौं – नेपाली राष्ट्रिय महिला फुटबल टोलीले फिफा वरियतामा १ स्थान सुधार गर्दै १००औं स्थानमा पर्न सफल भएको छ ।
विश्व फुटबल महासंघ ‘फिफा’ले शुक्रवार सार्वजनिक गरेको नयाँ वरियता अनुसार नेपाली टोली १०१औं स्थानबाट १००औं स्थानमा उक्लिन सफल भएको हो ।
१३औं सागमा अन्तिम अन्तराष्ट्रिय फुटबल खेलको महिला टोलीले लगभग २ वर्ष यता कुनै पनि प्रतियोगितामा सहभागिता जनाएको छैन । पोखरामा आयोजित १३औं साग अन्तर्गत महिला फुटबलतर्फ रजत पदक हासिल गरेको नेपाली महिला टोलीले फाइनलमा भारतसँग पराजय भोगेको थियो ।
त्यस्तै शुक्रवार सार्वजनिक गरिएको वरियता अनुसार दक्षिण एसियाली राष्ट्रमध्ये भारतीय महिला टोली सबैभन्दा माथि रहेको छ । भारतले ५७औं स्थान ओगट्दा बंगलादेश १३७, भुटान १६१, माल्दिभ्स १४४ र श्रीलंका १४३औं स्थानमा रहेका छन् ।
फिफा वरियताको शीर्ष स्थानमा अमेरिकी राष्ट्रिय महिला टोली रहेको छ भने दोस्रो स्थानमा जर्मनी र तेस्रो, चौथो तथा पाँचौं स्थानमा क्रमशः फ्रान्स, नेदरल्यान्ड्स र स्वीडेन रहेका छन् ।
नेपाली महिला टोलीले आउँदो सेप्टेम्बरमा ‘एएफसी महिला एसियन कप २०२२’ को छनोट अन्तर्गत फिलिपिन्स र हङ्कङसँग प्रतिस्पर्धा गर्नेछ ।