काठमाण्डौं । एमालेमा गएका माओवादीका १४ जना स्थानीय तहका जनप्रतिनिधिलाई आज कारबाही गर्ने निर्णय माओवादी केन्द्रले गरेको छ।
सोमबार बसेको माओवादी केन्द्रीय कमिटीको बैठकले उनीहरुलाई पदबाट हटाउने निर्णय गरेको हो । माओवादी नेता गिरिराजमणि पोखरेलका अनुसार जनप्रतिनिधिलाई कारबाही गर्न केन्द्रीय कमिटीको निर्णय चाहिने भएकाले आजको बैठकले कारवाही गर्ने निर्णय गरेको हो ।
निर्वाचन आयोगले केन्द्रीय कमिटीको निर्णय बेगर कारबाही प्रक्रिया अघि बढाउन नमाने पछि आजको बैठकले उनीहरुलाई कारवाही गरेको हो ।
कारवाहीमा पर्नेहरुमा रौतहटको मौलापुर नगरपालिका प्रमुख रिनाकुमारी साह, कटहरिया नगरपालिका प्रमुख सियाराम कुशवाहा, गोनाही नगरपालिका उपप्रमुख परनियादेवी देवाही, मौलानपुर नगरपालिका उपप्रमुख गौरीशंकर जयसवाल, विजयपुर नगरपालिका उपप्रमुख कान्तीदेवी फतुवा, मानवनारायण नगरपालिका उपप्रमुख सिमल साह र यमुनामाई गाउँपालिका उपाध्यक्ष गीतादेवी साह रहेका छन् ।
त्यस्तैगरी सिरहाको लहान नगरपालिका नगर कार्यपालिका सदस्य सतमीलाल दास ताती, महोत्तरीको सम्सी गाउँपालिका अध्यक्ष शेष फारुक, कैलालीको भजनी नगरपालिका उपप्रमुख छायाँ देवकोटा, गौरीगंगा नगरपालिका ४ का वडाअध्यक्ष भागीरथी विष्ट, गोदावरी नगरपालिका १ का वडाअध्यक्ष शर्मानन्द भट्ट, बर्दगोरिया नगरपालिका ४ वडाअध्यक्ष पुरन बिसी र ओखलढुंगाको चम्पादेवी गाउँपालिका १ का वडाअध्यक्ष सुरेशकुमार थापा पनि कारवाहीमा परेका छन् ।
