काठमाण्डौं । युरो कप २०२० अन्तर्गत गए राति भएको खेलमा स्पेन र पोल्यान्डले १–१ गोलको बराबरी खेल खेलेका छन् ।
स्पेनको घरेलु मैदान सेभिलमा भएको समूह ईको खेलमा स्पेनले खेलको २५औं मिनेटमा अग्रता लिएको थियो । जेरार्ड मोरेनोको पासमा अल्भारो मोराटाले गरेको गोलबाट स्पेनले पहिलो हाफमा अग्रता लिएको थियो ।
पहिलो हाफ १–० गोलले आफ्नो पक्षमा पारेको स्पेनले दोस्रो हाफमा आफ्नो अग्रता जोगाउन सकेन । खेलको ५४औं मिनेटमा पोल्यान्डका कप्तान तथा स्टार खेलाडी रोबर्ट लेवान्डोस्कीले गोल गर्दै खेललाई बराबरीमा पुर्याए ।
खेलको ५८औं मिनेटमा स्पेनले खेलमा अग्रता लिने मौका फेरि गुमायो । स्पेनले खेलमा पेनाल्टी प्राप्त गर्दा स्पेनका फरवार्ड खेलाडी जेरार्ड मोरेनोले सो पेनाल्टीलाई गोलमा परिणत गर्न नसक्दा खेल १–१ को बराबरीमै रहन पुग्यो ।
खेलमा त्यस पछि अरु कुनै गोल हुन नसक्दा दुवै टोलीले समान १–१ अंक बाँडेका हुन् ।