गोरखा – अबिरल बर्षा पछि आएको बाढीले उत्तरी गोरखाको सल्लेरी भन्ने स्थानमा रहेको ४ वटा घर बुढी गण्डकीले बगाएको छ । तर मानविय क्षति भने हुन पाएको छैन ।
सोमबार देखी परेको पानीका कारण बुढी गण्डकी नदीमा आएको बाढीले चुमनुब्री गाउँपालिका ३ को सल्लेरीमा रहेको सुर्यबहादुर गुरुङ, सुन्दर गुरुङ, थरपती गुरुङ र लक्ष्मण गुरुङको घर बगाएको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी प्रकाश दाहालले बताए ।
सूचना अधिकारी दाहालका अनुसार घर बगाएको भएता पनि मानविय क्षति भने नभएको जानकारी दिए । सल्लेरीमा नै अन्य ७ घर उच्च जोखिममा रहेका छन् ।
त्यहाँ बेनीघाट–आरुघाट–लाकेपास सडक निर्माणका लागि बसेका नेपाली सेनाको बेस क्याम्प समेत उच्च जोखिममा परेको प्रहरी कार्यालयले जनाएको छ ।
कहाँ कहाँ कस्ता क्षति भए त ?
- चुमनुब्री गाउँपालिका १ को सामागाउँमा पहाडबाट आएको पहिरोले २ रोपनी क्षेत्रमा गरिएको खेतीबाली नष्ट गर्नुका साथै करिब ६० वटा अस्थायी छाप्राहरु पनि क्षति हुन सक्ने भए पछि सो स्थानमा बस्दै आएका सबैलाई अन्यतै सारीएको ।
- भिमसेन थापा गाउँपालिका ४ धाँवाकी पम्फा परियारको ढुङ्गामाटोको घर भत्किएको ।
- शहिद लखन गाउँपालिका ३ को नयाँपुल स्थित मझुवा–मनकामना कच्ची सडक खण्डमा पहिरो गएर यातायात अबरुद्व भएको ।
- बारपाक सुलिकोट गाउँपालिका ४ को झोलुङे भन्ने स्थानमा पहिरो जादाँ बाह्रकिलो–छेवेटार–भालुस्वाराँ–बारपाक सडक अबरुद्व ।
- बारपाक सुलिकोट गाउँपालिका ४ झोलुङे निवासी सुरेश सुनार र सन्तबहादुर बि.क.को कच्ची घर दरौदी नदीमा आएको बाढीका कारण उच्च जोखिममा परेको ।
- धार्चे गाउँपालिका ५ माछीखोला स्थित बुढी गण्डकी नदी किनारमा बसोबास गर्ने १० घर परिवार जोखिममा परेको अन्यत्र सारीएको ।
- धार्चे गाउँपालिका ५ माछीखोलामा बुढी गण्डकीमा आएको बाढीले खानपानीको पाईप लाइन बगाएको ।
- सिराचोक गाउँपालिका ४ सेराफाँटमा २ रोपनी खेत र १५० मिटर लामो कुलो दरौदी नदीमा आएको बाढीले बगाएको ।
- गोरखा नगरपालिका १४ र शहिद लखन गाउँपालिका ३ मा रहेको हाट बजारमा पानी पसेर क्षति बनाएको ।
- बारपाक सुलिकोट गाउँपालिका २ को सोना झर्नामा क्षेत्रमा रहेको बालुवा–बारपाक सडकको भाग ९० मिटर भन्दा बढी दरौदी नदीले क्षति पुरयाएको ।
- चुमनुब्री गाउँपालिका ३ घट्टेखोलामा रहेको काठको फड्के खोलाले बगाउदा आवत जावतमा समस्या भएको ।
