एजेन्सी – इजरायलमा बेन्जामिन नेतन्याहूको १२ वर्षे शासनकाल समाप्त भएको छ ।
दक्षिणपन्थी नेता नाफ्टाली बेनेटले आफुसहित आइतबार संसदमा ६१ मत पाएपछि नेतन्याहू प्रधानमन्त्री पदबाट मुक्त भएका हुन् ।
योसँगै उनले नयाँ गठबन्धनको सरकारलाई सत्ता हस्तान्तरण गरेका हुन् । नयाँ सरकारको प्रस्ताव पेश गरेको विभिन्न ८ पार्टीको गठबन्धनबीच भएको सम्झौताअनुसार यामिना पार्टीका बेनेट सन् २०२३ को सेप्टेम्बरसम्म इजरायलको प्रधानमन्त्री बन्नेछन् ।
त्यसपछिको २ वर्षका लागि यायर लेपिड प्रधानमन्त्री बन्नेछन् । इजरायलमा बनेको नयाँ सरकारसँग विपक्षी गठबन्धनभन्दा केवल एक सिटमात्रै बढी छ ।
नयाँ सरकारमा पहिलो पटक सहभागि भएको एउटा दलले २१ प्रतिशत अरब अल्पसंख्यकको प्रतिनिधित्व गर्दछ ।
इजरायलमा नयाँ सरकार बनेपछि पछिल्लो २ वर्षदेखि देखिँदै आएको राजनीतिक अस्थिरता अन्त्य हुने विश्वास लिइएको छ ।
नेतन्याहू इजरायलमा सबैभन्दा लामो समयसम्म सत्तामा रहने नेता हुन् । नेतन्याहूले नयाँ सरकारलाई धोकाधडी र आत्मसमर्पणबाट बनेको खतरानक गठबन्धनको संज्ञा दिएका छन् । उनले छिटै नै नयाँ सरकार ढालिदिने चेतावनी समेत दिएका छन् ।
