गोरखा – गोरखा जिल्लामा निषेधाज्ञा पुनः थप गरिएको छ । जिल्ला स्तरीय कोभिड १९ संकट व्यवस्थापन केन्द्रको सोमबार जिल्ला प्रशासन कार्यालयमा बसेको बैठकले आगामी असार ५ गते सम्मका लागि निघेधाज्ञा गर्ने निर्णय गरेको हो ।
केन्द्रको यो निर्णयले अब जिल्लामा पुनः ११ दिन निषेधाज्ञा थप भएको छ । कोरोना संक्रमणको दोश्रो लहर बढे संगै गएको बैशाख २२ गतेदेखि निषेधाज्ञा लागु हुदै आएको छ । यो चौथो पटक निषेधाज्ञाको म्याद थप गरिएको प्रमुख जिल्ला अधिकारी शालिकग्राम शर्मा पौडेलले बताए ।
जिल्ला भित्र झनै कोरोना संक्रमण तिव्र रुपमा फैलिरहेकोले संक्रमण रोकथाम, न्युनिकरण र व्यवस्थापनका लागि निषेधाज्ञा थप गर्ने निर्णय भएको प्रजिअ पौडेलले बताए । बैठकले निषेधाज्ञाको अबधीमा दैनिक उपभोग्यबस्तु, खाद्यान्य, तरकारी, दुध तथा माछा, मासु, कृषिजन्य बिउबिजन मल पशुपन्छीको दान बिक्री गर्ने पसल र वर्कसप बिहान ५ः०० बजेदेखि ९ः०० बजेसम्म सञ्चालन गर्न पाउने निर्णय गरेको छ ।
त्यस्तै खानेपानी, सुरक्षा, स्वास्थ्य, सञ्चार, औषधी तथा औषधीजन्य उत्पादन र बिक्रि बितरण लगायत अत्याबश्यक बाहेकका सेवा सवै बन्द गर्ने निर्णय भएको छ । सञ्चारकर्मीका हकमा सूचना बिभागले जारी गरेको प्रेसपास र सञ्चारगृहले जारी गरेको परिचय पत्रको आधारमा आवातजावत गर्न सकिने निर्णय गरिएको छ ।
बैठकले बैंक तथा सहकारी बाहेका बित्तिय संस्थाहरु लधुबित्त, बिमा कम्पनीको सेवा प्रवाह बन्द गर्ने निर्णय गरेको छ । त्यस्तै सहकारी संस्थाको हकमा कार्यालय भित्रैबाट सञ्चालन हुने बाहेकका सेवा बन्द गर्ने तथा बैंक भित्र समेत २ मिटरको भौतिक दुरी अनिबार्य कायम गर्नुपर्ने निर्णय भएको छ । बैंकिङ सेवा निषेधाज्ञाको अबधीभर बिहान १०ः०० बजेदेखि २ः०० बजेसम्म मात्र सञ्चालन गर्न पाईने छ ।
