रोल्पा – कोरोना संक्रमित किशोरीलाई जबरजस्ती करणी प्रयास गरेको आरोपमा रोल्पा प्रहरीले १ जना इञ्जिनियरलाई पक्राउ गरेको छ ।
जिल्लाको रुन्टिगढी गाउँपालिकामा कार्यरत इञ्जिनियर ३६ वर्षीय शेषमणि पौडेलले सोही गाउँपालिकामा घर भएकी २० वर्षीया किशोरीलाई बलात्कार प्रयास गरेको आरोपमा प्रहरीले उनलाई पक्राउ परेका हो ।
पीडित किशोरीले दिएको जाहेरीका आधारमा इञ्जिनियर पौडेललाई पक्राउ गरिएको जिल्ला प्रहरी कार्यालय रोल्पाका प्रमुख प्रहरी नायव उपरीक्षक नवराज सुवेदीले बताए ।
पीडित किशोरी कोरोना संक्रमणपछि होम आइसोलेसनमा बस्दै आएकी थिइन् । घरभन्दा पर रहेको धारामा नुहाउदै गर्दा बोतलमा पानी भर्ने बहानामा पौडेलले आफूमाथि बलात्कार प्रयास गरेको पीडित किशोरीले प्रहरीलाई दिएको जाहेरीमा उल्लेख गरेकी छन् ।
धारामा नुहाउँदै गर्दा इञ्जिनियर पौडेलले किशोरीको संवेदनशील अंगमा सुमसुम्याउँदै आफूमाथि बलात्कार प्रयास गरेको भनेर पीडित किशोरीले जाहेरी दिए पछि पक्राउ गरीएको प्रहरी कार्यालयले जनाएको छ ।
पक्राउ परेका पौडेललाई इलाका प्रहरी कार्यालय होलेरीको हिरासतमा राखिएको छ । पौडेलमाथि जबरजस्ती करणी उद्योगको कसूरमा मुदा दर्तागरी थप अनुसन्धान अगाडि बढाइएको कार्यालयले जनाएको छ ।
