काठमाण्डौ – नेकपा एमालेको स्थायी कमिटी बैठक स्थगित गरिएको छ ।
माधवकुमार नेपाल पक्षले आजै केन्द्रीय कमिटी बैठक राखेपछि ओली पक्षको बैठक स्थगित गरिएको हो ।
बैठक आज अपरान्ह ४ः०० बजे बस्ने भनिएता पनि नेपाल पक्षको बैठकबाट आउने निर्णय अनुसार मात्र ओली पक्षको बैठक बस्ने भएको छ ।
आजै एमालेले पार्टीले कारवाही गरिसकेका व्यक्तिले बोलाएको अनधिकृत बैठकमा सहभागी नहुन केन्द्रीय सदस्यहरुलाई चेतावनी दिएको छ ।
वार्ताका नाममा ओलीको नयाँ खेल : नेपाल
उता एमालेबाट निष्कासित माधवकुमार नेपाल पक्षको केन्द्रीय कमिटी बैठकमा नेताहरुले वार्ताका नाममा अध्यक्ष केपी ओलीले नयाँ खेल रचेको निष्कर्ष निकालेका छन् ।
पछिल्लो राजनीतिक घटनाक्रमबारे छलफल गर्न भर्चुअल माध्यामबाट भएको बैठकमा अध्यक्ष ओलीले वार्तालाई दाउपेचका रुपमा प्रयोग गरेको बताएका छन ।
बैठकमा सहभागी नेताहरुले पार्टीभित्रै बसेर संघर्ष गर्नुपर्ने र नयाँ पार्टी गठनमा हतारो गर्न नहुने राय दिएका दिएका थिए ।
पार्टीलाई जेठ २ मै फर्काउन पहल गर्ने भन्दै नेपाल पक्षका नेताहरू सुरेन्द्र पाण्डे, घनश्याम भुसाल, गोकर्ण विष्ट र योगेश भट्टराई पछिल्ला केही दिनदेखि संस्थापन पक्षसँग वार्तामा थिए ।
