गोरखा – कोरोना माहामारी संगै जिल्लामा गरिएको निषेधाज्ञा सकिनै लाग्दा पुनः जेठ १५ गतेसम्म लम्ब्याइने निर्णय भएको छ ।
जिल्ला स्तरीय कोभिड–१९ संकट व्यवस्थापन केन्द्रको आजको बैठकले निषेधाज्ञालाई जेष्ठ १ गते देखी १५ गते सम्म यथावत राख्ने निर्णय गरेको हो । यस अघि भएको निर्णय अनुसारको निषेधाज्ञा बैशाख ३१ गते राती १२ः०० बजे सकिदै थियो ।
जिल्लामा संक्रमणको दर उच्च रहेको र रोकथाम, न्युनिकरण र व्यवस्थापनका लागि निषेधाज्ञा थप गर्ने निर्णय भएको प्रमुख जिल्ला अधिकारी शालिकग्राम शर्मा पौडेलले बताए ।
बैठकले निषेधाज्ञाको अबधीमा दैनिक उपभोग्यबस्तु, खाद्यान्य, तरकारी, दुध तथा माछा, मासु, कृषिजन्य बिउबिजन मल पशुपन्छीको दान बिक्रि गर्ने पसल र वर्कसप बिहान ५ः०० बजेदेखि ९ः०० बजे सम्म सञ्चालन गर्न पाउने निर्णय गरेको छ ।
त्यस्तै खानेपानी सुरक्षा, स्वास्थ्य, सञ्चार, औषधी तथा औषधीजन्य उत्पादन र बिक्रि बितरण लगायत अत्याबश्यक बाहेकका सेवा सवै बन्द गर्ने निर्णय पनि डिसिसिएमीको आजको बैठकले गरेको छ ।
निर्माण सामाग्री ढुवानीका साधन बेलुकी ७ः०० बजेदेखि ९ः०० बजेसम्म मात्र सञ्चालन गर्ने समेत बैठकले निर्णय गरेको छ । सञ्चारकर्मीहरुको हकमा सूचना बिभागले जारी गरेको प्रेसपास वा सम्वन्धीत सञ्चारगृहले जारी गरेको परिचय पत्रको आधारमा आवातजावत गर्न दिइने भएको छ ।
गोरखा नगरपालिका भित्रका बैंकहरु आकस्मिक सेवा बाहेका सबै सेवा बन्द गर्ने, बित्तिय संस्थाहरु अन्तरर्गत सहकारी, लधुबित्त, इन्सुरेन्स लगायतका सेवा पूर्ण रुपमा बन्द गर्ने, बाहिरी जिल्लाबाट हुने तरकारी ढुवानीलाई समेत रोक्ने निर्णय बैठकले गरेको छ ।
त्यस्तै बिभिन्न संघसंस्था तथा राजनीतिक दलबाट प्राप्त भएको भवनमा आइसोलेसन निर्माण, आइसोलेसन केन्द्रमा चिकित्सकीय सेवा प्रदान गर्ने र आइसोलेसन निर्माण वा सञ्चालन र व्यवस्थापनका लागि प्रदेश सरकारसंग ५० लाख रुपैया बजेट माग गर्ने निर्णय भएको प्रमुख जिल्ला अधिकारी पौडेलले जानकारी दिए ।
त्यस्तै जिल्ला भित्रका निजी अस्पतालहरुमा स्थापना गरिएको आइसोलेसन केन्द्रमा आबश्यकता अनुसार जनशक्ति, स्वास्थ्य सामाग्री उपलब्ध गराउने निर्णय पनि बैठकले गरेको छ ।
जिल्लामा बैशाख २२ गतेदेखि ३१ गते सम्मको पहिलो चरणको निषेधाज्ञा जारी भएको थियो ।
