गोरखा – जिल्लाको आरुघाट गाउँपालिकामा पनि कोरोना संक्रमणका बिरामीहरु बढ्न थाले पछि आजै राती देखी निषेधाज्ञा जारी गरिएको छ ।
पालिकाको सिफारीसमा जिल्ला स्तरीय कोभिड १९ संकट ब्यवस्थापन केन्द्रले मङ्गलबार राती १२ः०० बजे देखी बैशाख ३१ गते राती १२ः०० बजे सम्मका लागि निषेधाज्ञा जारी गरेको हो ।
मङ्गलबार जिल्ला प्रशासन कार्यालयमा केन्द्रका अध्यक्ष एवं प्रमुख जिल्ला अधिकारीको अध्यक्षमा भएको बैठकले गाउँपालिका भित्र हुन सक्ने संक्रमणको तिब्र फैलावट रोकथाम तथा नियन्त्रणको लागि निषेधाज्ञा जारी गर्ने निर्णय भएको हो ।
केन्द्रको बैठकमा तत्काल उच्च सर्तकता अपनाई संक्रमण रोकथाम, नियन्त्रणका कार्यहरु प्रभावकारी रुपमा संञ्चालन एवं ब्यवस्थापन गर्न आवश्यक भएको भन्दै आरुघाट गाउँपालिका क्षेत्रभर निषेधाज्ञा गर्ने निर्णय भएको प्रमुख जिल्ला अधिकारी शालिग्राम शर्मा पौडेलले बताए ।
आजै राती १२ः०० बजे देखी ३१ गते राती १२ः०० बजे सम्म गोरखा र पालुङटार नगरपालिकामा पनि निषेधाज्ञा जारी गरिएको छ । जिल्लामा यो सहित ३ वटा पालिकामा निषेधाज्ञा जारी गरिएको छ ।
