गोरखा – चोरी बढेसंगै गोरखा बजारमा रहेका बैंकहरुको लकर प्रयोग गर्नेहरुको संख्या बढ्न थालेको छ ।
गोरखा बजार क्षेत्रमा दिनदाहाडै चोरीको घटना बढ्न थाले संगै आफु संग भएको बहुमुल्य बस्तु बैंकको लकरमा राख्नेहरुको संख्या ह्वात्तै बढेको हो ।
गोरखा सदरमुकाममा क श्रेणी १७ बैंक छन् । ति मध्ये पनि एनएमबि बैंक र एभरेष्ट बैंकमा मात्र लकर सुविधा छन् । दुवै बैंकमा गरी १७४ वटा लकर रहेकोमा अधिकाशं लकर प्रयोगमा आईसकेको बैंकले जानकारी दिएको छ ।
बैंकमा रहेका ति लकरहरु प्रयोगकर्ताले आफुसंग भएको बहुमुल्य बस्तु राख्ने गरेको छन् । बिशेषत सुनका गरगहना राख्ने गरेको एनएमबि बैंक गोरखाका शाखा प्रबन्धक केशव रेग्मीले बताए । प्रबन्धक रेग्मीका अनुसार ९० वटा लकर रहेको उनको शाखामा अहिले ६० प्रतिशत भन्दा बढी प्रयोगमा आईसकेको छ ।
मनास्लु बिकास बैंक हुदैमा राखिएका ति लकरहरु पछिल्लो समय प्रयोगकर्ताले बढी प्रयोग गर्न थालेको हो । यो बैंकमा रहेको लकरहरु भने ब्यापारी र कर्मचारीहरुले बढी प्रयोग गरेको प्रबन्धक रेग्मीले जानकारी दिए । यो बैंकमा लकर प्रयोग गरेबापत बार्षिक २ हजार रुपैयाँ शुल्क भूक्तानी गनुपर्ने छ ।
त्यस्तै गरी गोरखा बजारमा नै रहेको एभरेष्ट बैंकले पनि स्थापना देखी नै लकर सुविधा दिदै आएको छ । थोरै मात्र प्रयोग कर्ता रहेको यो बैंकमा पनि पछिल्लो समय लकर सुविधा लिनेको संख्या बढ्न थालेको शाखा प्रबन्धक अमिर केसीले बताए ।
बैंकमा रहेको साना ठुला गरी कुल ७४ लकर मध्ये अहिले २० प्रतिशत भन्दा बढी प्रयोगमा आई सकेको र दिनदिनै माग बढ्न थालेको प्रबन्धक केसीले जानकारी दिए । यो बैंकमा लकर सुविधा लिनेमा भने अधिकाशं ब्यापारीहरु रहेका छन् ।
बैंकले लकर सुविधा लिनेलाई बैशाख महिनाभरी विशेष अफर समेत ल्याएको छ । अन्य बेला भने प्रयोगकर्ताले बार्षिक २ हजार ५०० रुपैयाँ बैंकलाई भूक्तानी गनुपर्ने हुन्छ । बहुमुल्य बस्तु लकरमा राख्दा कुनै पनि रिक्स लिनुनपर्ने बैंकले जनाएको छ ।
जिल्ला प्रहरी कार्यालय गोरखाले उपलब्ध गराएको रेकर्ड अनुसार गएको साउन ४ गते देखी फागुन ६ गते सम्ममा जिल्ला ८ वटा चोरीका मुद्वा दर्ता भएको छ । अधिकाशं घटनामा गरगहना तथा नगद चोरी भएको देखिन्छ ।