एजेन्सी – अमेरिकी राष्ट्रपति जो बाइडनले मे महिनाभित्र सबै वयस्क अमेरिकीहरूलाई खोप दिने बताएका छन् ।
आफ्नो कार्यकालको पहिलो टेलिभिजन सम्बोधन गर्दै उनले मे महिना भित्र सबै वयस्क अमेरिकीहरूलाई खोप दिलाउन पुग्ने गरी आपूर्ति व्यवस्था मिलाइएको बताएका हुन् ।
उनले त्यसका लागि तयारी गर्न सबै राज्य र स्थानीय निकायलाई आदेश दिने भन्दै सबैलाई पालो आएपछि खोप लगाउन पनि उनले आह्वान गरे ।
एक वर्षको क्षतिपछि अमेरिकामा राम्रा दिन आउन लागेको उनको भनाइ छ । जुलाई ४ को अमेरिकी स्वतन्त्रता दिवसको समयताका स–साना भेला गर्न सकिने पनि उनले उल्लेख गरेका छन् । कोरोना भाइरसका कारण अमेरिकामा ५ लाख भन्दा धेरेको मृत्यु भएको छ ।
यसैबीच महामारीसँग जुधेका नागरिकका लागि ल्याइएको राहत प्याकेज सम्बन्धी विधेयकमा राष्ट्रपति बाइडेनले हस्ताक्षर गरेका छन् । हस्ताक्षरसँगै यो विधेयकले कानुनी रुप लिएको छ ।
१९ खर्व डलरको आर्थिक राहत प्याकेजबाट कोरोना प्रभावित भएका अमेरिकीहरुलाई सहायता प्रदान गरिनेछ । विधेयकमा १ हजार ४ सय डलर भुक्तान, बेरोजगारी भत्ता विस्तार लगायतका सुविधा समेटिएका छन् ।
