काठमाण्डौं – सभामुख अग्निप्रसाद सापकोटा संवैधानिक परिषद् बैठकमा नजाने भएका छन् ।
संवैधानिक परिषदमा नजाने बिषयमा उनका प्रेस सल्लाहकार श्रीधर न्यौपानेले जानकारी दिएका हुन् ।
‘‘बैठकअघि हुनुपर्ने समन्वय नभएको र पूर्वतयारी र गृहकार्य पनि नगरेको भन्दै सभामुख बैठकमा नजाने भएका हुन् । परिषद्को अध्यक्ष समेत रहेका प्रधानमन्त्री केपी शर्मा ओलीले ती कार्य नगरेको भन्दै सभामुख बैठकमा नजाने प्रेस सल्लाहकार न्यौपानाले जनाए ।
यसअघि सभामुख सापकोटा र प्रमुख प्रतिपक्षी दल कांग्रेस सभापति शेरबहादुर देउवा नजाँदा बैठक स्थगीत भए पछि प्रधानमन्त्री ओलीले आजको लागि बैठक बोलाएका थिए ।
प्रधानमन्त्री ओलीको अध्यक्षतामा बस्ने बैठकले अख्तियार दुरुपयोग अनुसन्धान आयोगलगायत विभिन्न संवैधानिक अंगमा नियुक्तिका लागि सिफारिस गर्ने तयारी छ ।
नेपालको संविधानको धारा २८४ मा संविधानबमोजिम प्रधानन्यायाधीश र संवैधानिक निकायका प्रमुख र पदाधिकारीहरूको नियुक्तिको सिफारिस गर्न प्रधानमन्त्री, प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, प्रतिनिधिसभाका विपक्षी दलका नेता र प्रतिनिधिसभाको उपसभामुख सदस्य रहेको संवैधानिक परिषद् रहने व्यवस्था छ।
प्रतिनिधि सभामा हाल उपसभामुख पद भने रिक्त रहेकोछ ।
