काठमाण्डौं – प्रधानमन्त्री केपी शर्मा ओलीले आज बोलाएको सर्व दलिय बैठकमा नेपाली काँग्रेसले सरकारले चार गल्ती गरेको आरोप लगाएका छन् ।
बैठकमा सहभागी प्रमुख प्रतिपक्षी दल नेपाली काँग्रेका सभापति शेरबहादुर देउवाले सरकार कोरोनाको रोकथाम र नियन्त्रणमा असफल भएको, भ्रष्टाचार बढेको, सरकारका गतिविधिका कारण नागरिकमा निराशा छाएको र पछिल्लो समय राजतन्त्रको पक्षमा सडकमा प्रदर्शन बढेको भन्दै सरकारलाई ध्यानाकर्षण गराएका हुन् ।
पछिल्लो समयमा देशभर भइरहेका संविधानविरोधी र हिंसात्मक गतिविधिको विरोधमा जुट्न सबै दल एक हुनुपर्ने भन्दै प्रधानमन्त्री ओलीले आजको सर्वदलिय बैठक बोलाएको हो ।
प्रधानमन्त्रीको सरकारी निवास बालुवाटारमा बसेको सर्वदलीय बैठकमा प्रधानमन्त्री ओलीले संविधान विरोधी र हिंसात्मक गतिविधिको विरोधमा एकजुट हुन सबै दललाई आग्रह गरेका थिए ।
बैठकको शुरुमा प्रधानमन्त्री ओलीले छलफल गर्नुपर्ने एजेन्डाबारे दलहरुलाई जानकारी गराएका थिए ।
सर्वदलीय बैठकमा संघीय संसदमा प्रतिनिधित्व गर्ने दलका प्रतिनिधि र पूर्व प्रधानमन्त्रीहरुको समेत सहभागी रहेको थियो ।
बैठकमा राजसंस्था पुनःर्स्थापनाका लागि देशभर भइरहेको प्रदर्शन, कोभिड महामारी लगायत समसामयिक विषयमा छलफल भएको थियो । बैठकमा नेपाल कम्युनिष्ट पार्टी (नेकपा), नेपाली कांग्रेस, जनता समाजवादी पार्टी (जसपा), राष्ट्रिय प्रजातन्त्र पार्टी (राप्रपा), राष्ट्रिय जनमोर्चा र नेपाल मजदुर किसान पार्टी (नेमकिपा) को सहभागिता रहेको थियो ।
