एजेन्सी – अमेरिकामा क्रिसमसपछि कोरोना संक्रमणको अर्को लहर फैलन सक्ने चेतावनी दिइएको छ ।
प्रमुख संक्रामक रोग विज्ञ डा.एन्थोनी फाउचीले संक्रमणका घटनाहरूको अर्को लहर फैलने चेतावनी दिएका हुन् । उनले लामो क्रिसमस र नयाँ वर्षको छुट्टिको समय थप चुनौती बन्न सक्ने बताए ।
अहिले पनि थ्याङ्सगिभिङ पर्वपछि बढ्न थालेका संक्रमण ठूलो समस्या बनिरहेको उनको भनाइ छ । जनवरीको मध्यतिरको अवस्था अमेरिकाको लागि निकै भयानक समय हुनसक्ने भन्दै फाउचीले चिन्ता व्यक्त गरेका छन् ।
अमेरिकाको खाद्य तथा औषधि निकाय एफडीएका पूर्वआयुक्त स्कट गोटलिबले अमेरिकामा जनवरीको अन्त्यसम्ममा मृत्यु हुनेको संख्या ४ लाख पुग्ने बताएका छन् । अमेरिकामा औसतमा दैनिक २ लाखमा कोरोना संक्रमण देखिएको छ ।
अस्पतालहरू बिरामीले भरिन थालेपछि अमेरिकाका २ ठूला राज्यहरू क्यालिफोर्निया र न्यूयोर्कले जनस्वास्थ्य संकटको चेतावनी दिएका छन । क्यालिफोर्नियामा कडा लकडाउन लागू गरिएको छ ।
अन्य राज्यहरूमा समेत अहिलेसम्मकै उच्च संक्रमण देखिएको छ । अहिलेसम्म अमेरिकामा १ करोड ४७ लाखभन्दा बढीमा संक्रमण पुष्टि भएको छ । २ लाख ८२ हजार ५०० भन्दा बढीको मृत्यु भैसकेको छ ।
साँकेतिक तस्बिर
