काठमाण्डौं – नेपालमा कोरोना भाइरसविरुद्धको खोपका लागि ६० अर्ब लाग्ने अनुमान गरिएको छ ।
स्वास्थ्य तथा जनसंख्या मन्त्रालयले गठन गरेको विज्ञ समितिले खोपका लागि उत्त रकम आवश्यक पर्ने अनुमान गरेको हो ।
कोरोना भाइरस संक्रमण विरुद्धको खोपका लागि २० प्रतिशत रकम आफुले ब्यर्होने र बाँकी रकम दातृ निकायलाई आग्रह गर्ने तयारी सरकारले गरेको छ । विकास साझेदार र दातृनिकायले सहयोग उपलब्ध गराए यो खर्च कम हुनसक्ने अनुमान स्वास्थ्य मन्त्रालयको छ ।
खोपका लागि सहयोग गर्ने विश्वव्यापी सञ्जाल ‘गाभी’ले नेपालको लागि सहयोग दिने आश्वासन दिएको छ । गाभीले कम र मध्यम कम आय भएका नेपालसहित ९२ देशलाई खोप उपलब्ध गराउने यसअघि नै घोषणा गरिसकेको छ ।
खोप नेपाल भित्र्याउनका लागि केही दिन अघि सरकारले अर्थ, परराष्ट्र तथा स्वास्थ्य मन्त्रालयका सचिव सम्मिलित समिति गठन गरिसकेको थियो । खोप खरिदको विषयमा नेपाल सरकारले निजी क्षेत्रलाई पनि अनुरोध गरेको छ ।
मन्त्रिपरिषद्ले निजी क्षेत्रलाई पनि खोप भित्राउन बाटो खोल्ने निर्णय गरेको छ । सरकारले खोप भण्डारणका लागि आवश्यक पूर्वाधार बनाउन लाग्ने खर्च, सुरुमा खोप प्राप्त गर्ने जनसंख्या जस्ता विषयमा गृहकार्य गरिरहेको छ ।
अहिलेसम्म कुनैपनि खोपले विश्व स्वास्थ्य संगठनबाट सर्वसाधारणमा प्रयोगका लागि अनुमति पाइसकेको छैनन् । विश्वभर दर्जन भन्दा बढी खोप तेस्रो चरणको परीक्षणमा छन् ।
