काठमाण्डौं – गरिब देशहरुलाई विश्व बैकले कोरोना भाइरसविरुद्धको खोप विकास तथा वितरण अभियानमा सघाउन १२ अर्ब अमेरिकी डलर सहयोगको प्रस्ताव पारित गरेको छ ।
विश्वका कमजोर अर्थतन्त्र भएका मुलुकहरुलाई कोरोनाविरुद्धको खोप खरिद तथा वितरण गर्न सहयोग गर्नेगरी विश्व बैंकले उक्त बजेट पारित गरेको हो ।
बैंकले जारी गरेको एक विज्ञप्तीमा कोरोना विरुद्धको बृहत अभियान ‘विश्व बैंक गु्रप प्याकेज’को एक सय ६० अर्ब डलरअन्तरगत नै तत्कालका लागि १२ अर्ब डलरको सहयोग योजना घोषणा गरिएको जनाइएको छ ।
विश्व बैंकले आफ्नो विज्ञप्तीमा यो सहयोग विश्व स्वास्थ्य संगठनले नेतृत्व गरेको ‘कोभ्याक्स’ योजना अन्तरगत खर्च गरिने पनि प्रष्ट पारेको छ ।
‘कोभ्याक्स’ योजना विश्व स्वास्थ्य संगठनको नेतृत्वमा विश्वभरका १११ कमजोर अर्थतन्त्र भएका मुलुकलाई कोरोनाविरुद्धको खोप खरिद र वितरण गर्न सहयोग गर्नेगरी ल्याइएको हो ।