गोरखा समाचारदाता
गोरखा – गोरखा छोप्राकका एक घरवेटीले आफ्नो घरमा बस्ने सबैलाई घरभाडा छुट दिएको छ ।
नोबल कोरोना भाइरस (कोभिड–१९)ले गर्दा समस्यामा परेको भन्दै घरमा बस्नेहरुलाई १ महिनाको भाडा छुट दिएको हो ।
सिराचोक गाउँपालिका ४ छोप्राकका रामशरण कामीले घरमा बस्दै आएका सबैलाई १ महिनाको भाडा छुट दिएको छ । ‘कोरोना भाइरसको महामारीसंगै गरिएको लकडाउनका कारण आर्थिक तथा ब्यावसायिक कारोवारमा नकारात्मक प्रभाव परेको भन्दै मेरोमाइक्रोफाइनान्स लघुवित्त वित्तीय संस्था लिमिटेडलाई घरभाडामा सहुलियत दिएको’ शाखा कार्यालयका प्रमुख दिपक भट्टले बताए ।
‘लकडाउनले सबैलाई हतोत्साही बनिरहेको यो अवस्थामा सरकारले पनि एक महिनाको भाडा नलिन आब्हान गरेको र आफूले पनि संस्थाको समस्या बुझेको’ भन्दै कामीले १ महिनाका भाडा मिनाह गरिदिएको बताए । ‘समाजमा बसे पछी संकटको बेला एक अर्कालाई साथ नदिए के सामाजिक दायित्व निर्वाह भयो त ?’ उनले प्रति प्रश्न समेत गरे ।
मेरोमाइक्रोफाइनान्स लघुवित्त वित्तीय संस्था लिमिटेडले कोरोना भाइरस संक्रमण, रोकथाम, नियन्त्रण तथा उपचार कोषमा २५ लाख ६० हजार ७१९ रुपैयाँ सहयोग उपलब्ध गराई सकेको कम्पनीका प्रमुख कार्यकारी अधिकृत रामहरी दाहाले बताए ।
संस्थाको छोप्राक शाखाले पनि सिरानचोक गाउँपालिकालाई २० हजार रुपैयाँ आर्थिक सहयोग उपलब्ध गराएको शाखा प्रमुख भट्टले बताए ।
मेरोमाइक्रोफाइनान्स लघुवित्त बित्तीय संस्था लिमिटेड नुवाकोटको बट्टारमा कर्पोरेट कार्यालय रहि देशका ५९ जिल्लामा १२० शाखा कार्यालय र तनहुँको खैरेनीटारमा अनुगमन कार्यालय अन्र्तगत गोरखाको छोप्राक सहित ७ जिल्लामा ८ शाखा कार्यालयमार्फत लघुवित्तीय सेवा प्रदान गरिरहेको छ ।