गोरखा समाचारदाता
काठमाण्डौं – कोरोना संक्रमितको संख्या थपिन थालेपछि राजधानीको भित्री सडकमा हिड्नेलाई पनि पक्राउ गर्न थालिएको छ ।
विभिन्न बहानामा घरमा नबसी भित्री सडकमा हिड्नेहरुको संख्या धेरै हुन थाले पछि आज (सनिबार) देखी पक्राउ गरिन थालेको हो ।
जिल्ला प्रशासन कार्यालय काठमाडौंले लकडाउनलाई कडाइ गर्न यस्तो उपाय अपनाईएको जनाएको छ । प्रशासनका अनुसार अब कुनै पनि विभिन्न बहानामा भित्री सडक तथा गल्लीमा निस्किने व्यक्तिलाई पनि पक्राउ गरी कानूनी कारवाही गरिने भएको हो ।
शुक्रबार दिउँसो बसेको जिल्ला सुरक्षा समितिको बैठकले अनावश्यक भीड नियन्त्रण गर्न यो नियम लागू गर्ने निर्णय गरेको हो । प्रशासनले यसअघि जारी भएका सबै पास पनि खारेज भएको जनाएको छ । अब जारी हुने पास नीलो रङको हुने बताइएको छ ।
प्रशासनले अत्यावश्यक सवारीसाधनलाई बेलुकी ८ बजेदेखि बिहान ६ बजेभित्र मात्र हिंड्न दिने भएको छ । एम्बुलेन्स, शव बाहन, औषधि तथा स्वास्थ्य सामग्री, पेट्रोलियम पदार्थ, ग्यास, सबै खाद्य वस्तु, तरकारी तथा फलफूललगायतका सामग्री बोकेका गाडीलाई भने बिना पास नै आवागमन गर्न दिइने जिल्ला प्रशासन कार्यालयले जनाएको छ ।
