नायिका पुजा शर्मा अभिनित २ फिल्म नै यतिबेला प्रदर्शनको लागि अन्योलमा छ । कोरोनाले गर्दा थपिदै गएको लकडाउनको कारण यतिबेला उनी अभिनित ‘म यस्तो गीत गाउछु-२’ र ‘सम्हालिन्छ कहिले मन’ फिल्म अन्योलमा परेको हो । गत वर्ष २०७६ को फागुन ३० बाट प्रदर्शनको तयारिमा रहेको ‘म यस्तो गीत गाउछु-२’ कोरोनाका कारण अनिश्चितका लागि पोष्टपोण्ड भयो भने सम्हालिन्छ कहिले मन भने आउदो तिजमा रिलिजको घोषण यसअघि नै भैसकेको छ ।
तर, अवस्था झन भयावह बन्दै गैरहेको कारण ‘सम्हालिन्छ कहिले मन’ को प्रदर्शन पनि अन्योलमा पर्ने देखिन्छ । तर, नायिका पुजा शर्माले भने यस फिल्मका तस्विरहरुलाई एक पछि अर्को गर्दै सार्बजनिक गरिरहेकी छन् । केही समय अघि सामाजिक संजालमा यो फिल्मको एक गीतको आफ्नो लुक्स सार्बजनिक गरेकी उनले फेरि फिल्मका नायक मध्येका एक सोनम तोप्देन संगको रोमान्टिक तस्विर सार्बजनिक गरेकी हुन् । गलामा हेडफोन भिरेकी पुजा सोनमसंगै बिन्दास मुडमा देखिएकी छन । एक तस्विरमा सोनमले साईकलमा पुजालाई डोहोर्याईरहेका छन ।
यो फिल्मलाई सुदर्शन थापाले निर्देशन गरेका हुन् । फिल्ममा पूजा शर्मा, आकाश श्रेष्ठ, सोनम तोप्देन लगायतका कलाकारको मुख्य भूमिका छ । यो फिल्म गत वर्ष नै रिलिज हुनुपर्ने हो । तर, विविध कारणले गर्दा चलचित्र रिलिज हुन सकेन । सम्पूर्ण छायांकन यूकेमा भएको यस फिल्ममा अभिनेत्री पूर्जा शर्माले अभिनेताद्वय आकाश श्रेष्ठ र सोनम तोप्देनसँग रोमान्स गरेकी छिन् । आकाशसँग यसअघि उनले ‘रामकहानी’ मा काम गरेकी थिइन् भने सोनम नेपाली फिल्मका लागि नयाँ अनुहार हुन् । फिल्म पूर्ण रुपमा लभस्टोरी कथामा निर्माण हुनेछ ।
गौरी मल्ल, सरोज खनाल, धिरेन शाक्यलगायतका कलाकारहरुको पनि फिल्ममा अभिनय रहनेछ । महेश दवाडीको कथामा आधारित भएर निर्माण हुने फिल्मका गीतमा अर्जुन पोखरेल, सुगम पोखरेल र ताराप्रकाश लिम्बुले संगीत भरेका छन् । फिल्मलाई सौरभ लामाले खिचेका छन् । कविराज गहतराजको कोरियोग्राफी रहेको फिल्म अमित कुमार बस्नेतको निर्माणमा बनेको हो । फिल्ममा परि राना र अजित कुमार थापा सह-निर्मातामा छन् भने अंकित गौतम कार्यकारी निर्मातामा छन् । गायक सुगम पोखरेलको चर्चित गीत ‘सम्हालिन्छ कहिले मन’ बाट फिल्मको नाम सापटी लिइएको हो ।
