एजेन्सी – नोवल कोरोना भाइरस संक्रमण संगै अहिले विश्वभर नै नक्कली औषधिको विगविगी बढेको पाइएको छ ।
औषधिसम्बन्धी अपराधविरुद्ध काम गर्ने संस्था इन्टरपोलका अनुसार मलेसियादेखि मोजाम्बिकसम्म नक्कली मास्क र औषधिहरु बिक्री भइरहेको पाइएको हो ।
स्वास्थ्य संकटका बेला औषधिजन्य नक्कली सामग्रीको अवैध व्यापारले चुनौती थपेको इन्टरपोलका महासचिव युर्गन स्टकले बताएका छन् ।
इन्टरपोलको विश्वव्यापी इकाइ अपरेसन ‘पान्जिया’ले कोरोना भाइरसलाई महामारीको रुपमा विश्व व्यापार संगठनले घोषणा गरेकै एक सातामा ९० वटा देशबाट १२१ जनालाई पक्राउ गरेको तथ्यांक सार्वजनिक गरेको छ ।
उसले १ करोड १४ लाख डलर बराबरका घातक खालका औषधि समेत जफत गरेको छ । ती मध्ये कतिपय कोरोना निको पार्ने दावी गरिएका औषधि समेत छन् ।
विश्व स्वास्थ्य संगठनको तथ्यांक अनुसार ३० अर्ब डलर बराबरका नक्कली तथा म्याद नाघिसकेका औषधिको व्यापार न्यून र मध्यम आय भएका देशहरूमा हुने गरेको छ ।