गोरखा समाचारदाता
गोरखा – गोरखा नगरपालिकाको कोरोना संक्रमण नियन्त्रण तथा राहत कोषमा ३५ लाख भन्दा बढी रकम जम्मा भएको छ ।
नगरपालिकाले विहिबार स्थापना गरेको कोषमा ३५ लाख ७५ हजार जम्मा भएको हो ।
नगरपालिकाको आज (विहिबार) बसेको कार्यपालिकाको बैठकले ‘राहत सामाग्री वितरण सम्वन्धी कार्यविधि, २०७६’ पास गर्दै कोषमा नगरपालिकाको तर्फबाट २५ लाख रुपैयाँ राख्ने निर्णय भएको नगर प्रमुख राजनराज पन्तले बताए । यस अघि उत्त कोषमा जम्मा हुने गरी प्रदेश सरकारबाट १० लाख रुपैयाँ प्राप्त भएको पन्तले बताए ।
कार्यपालिकाले विहिबारको बैठकबाट ‘कोडिभ–१९, कोरोना भाइरसको नियन्त्रणका लािग गोरखा नगरपालिका क्षेत्रभित्र दैनिक ज्यालादारीमा जीवन निर्वाह गरिरहेका अति विपन्न र अशक्त परिवारहरुका लागि ब्यवस्थित तवरले राहत वितरण गर्न’ कार्यविधिको निर्माण गरेको हो ।
कोषको प्रमुख नगरप्रमुख हुने कार्यविधिले ब्यवस्था गरेको नगरपालिकाले जनाएको छ । उत्त कोषमा आजै गोरखामा केन्द्रिय कार्यालय रहेको साधना लघु वित्तिय संस्थाले ५० हजार हस्तान्रण गरेको थियो । संस्थाले कार्यालयमा नै पुगेर ५० हजारको चेक हस्तान्तरण गरेको हो ।
त्यस्तै गरी उत्त कोषमा जम्मा हुने गरी आजै लायन्स क्लव अफ गोरखा र लायन्स क्वल अफ गोरखाकालीका (महिलाहरुको) ले पनि २५ हजारको चेक हस्तान्रतण गरेको छ ।
लायन्स क्लवले दियो ७ पिपिई सेट
लायन्स क्लव अफ गोरखा र लायन्स क्वल अफ गोरखाकालीले विहिबार गोरखा अस्पताल र लायन्स क्लव अफ गोरखा प्रस्तावित लायन्स आँखा अस्पतालकोलागि ७ सेट पिपिई हस्तान्तरण गरेको छ ।
डिस्ट्रीक ३२५ वि १ बाट प्राप्त पिपिई ७ सेट मध्ये गोरखा अस्पताललाई ५ थान र लायन्स आँखा अस्पताल २ थान लायन्स क्वल गोरखाका अध्यक्ष एमजिएफ लायन अच्यूतलाल श्रेष्ठ र गोरखकालीकाका अध्यक्ष लायन विण्णुमाया मास्के द्वारा संयुत्त रुपमा हस्तान्तरण गरिएको हो ।
त्यस्तै गरी सोही कार्यक्रममा गोरखा नगरपालिकाद्वारा रानिवनमा निमार्ण भएको आइसोलेसन वार्डको लागि १० थान डविन र १० मग प्रदान गरिएको थियो ।
पद्वतीले पनि दियो सरसफाई सामाग्री
पद्वती विकास सेवा केन्द्र गोरखाले पनि गोरखा नगरपालिकालाई सरसफाई सामाग्री हस्तान्तरण गरेको छ ।
संस्थाका कार्यकारी निर्देशक कमला लामिछानेले गोरखा नगरपालिकाको कार्यालयमा नगरप्रमुख राजनराज पन्तलाई ३५० वटा मास्क र ३५० वटा हातधुने साबुन हस्तान्तरण गरेको छ ।
त्यस्तै गरी आजै युएनडिपीले समेत गोरखा नगरपालिकालाई मास्क, स्यानिटाइजर र कोरोना सम्वन्धी चेतना मुलक पर्चा हस्तान्तरण गरेको नगरपालिकाले जनाएको छ ।
