गोरखा समाचारदाता
गोरखा – गोरखाको टक्सारमा ५० वेडको क्वारेन्टाइन बनेको छ ।
टक्सारमा रहेको मनकामना आवासिय बहिरा बिद्यालयमा ५० वेडको क्यारेन्टाइन बनेको हो ।
गोरखा नगरपालिकाको आर्थिक सहयोग एवं नेपाली सेनाको रणसिं दल गणको सहायतामा उत्त विद्यालयमा ५० वेडको मास क्वारेन्टाइन स्थापना भएको गणपती उज्वल केसीले बताए । ‘हाम्रा जवानहरुले दुई दिन लगाएर ५० वेड तयार गरेका छन् ।’ गणपती केसीले भने ‘आवश्यताको आधारमा अरु वेडहरु पनि तयार गरिदै जाने’ उनले बताए ।
स्कुलका छात्र÷छात्रा बस्ने फलामे खाटलाई प्रयोग गरी अहिले वेड तयार गरिएको छ । विशेष भारतबाट गोरखा जिल्लामा आउनेहरुको लागि यहाँ राख्ने गरी वेड तयार गरीएको हो ।
विश्वभर फैलिएको कोरोना भाइरस (कोडिभ–१९) का कारण तेस्रो देश तथा भारतबाट आउनेहरुको लागि १४ दिन बस्ने गरी यो क्वारेन्टाइन तयार गरिएको गोरखा नगरपालिकाले जनाएको छ ।
क्यावारेन्टाइनमा निर्माण गरिएका बेडमा कालो मेट्रेशमाथी हरियो तन्ना र त्यस माथि १ थान कम्बल र सिरानी राखिएको छ ।
क्यारेन्टाइनमा प्रयोग भएका कम्बर र त्रिपाल नेपाल रेडक्रस सोसाईटी जिल्ला शाखाले उपलब्ध गराएको हो । शाखाका सभापति भगवानबावु मास्केका अनुसार टक्सारको क्वारेन्टाइनका लागि शाखाले १५० थान कम्बल र १५ थान त्रिपाल उपलब्ध गराएको छ ।
त्यस्तै गरी शाखाले जिल्लाको बारपाक सुलिकोट गाउँपालिकाको लागि १०० थान कम्बलका साथै गोरखा अस्पताल, भिमसेन थापा र शहिद लखनको त्रिवेणी क्षेत्रमा हेल्प डेस्कका लागि १/१ थान टेन्ट समेत उपलब्ध गराएको शाखाले जनाएको छ ।
