गोरखा समाचारदाता
काठमाण्डौं – प्रधानमन्त्री केपी ओली शिक्षण अस्पताल महाराजगन्जवाट डिस्चार्ज भएका छन् ।
मिर्गौला प्रत्यारोपणको १० दिनपछि उनी आज साँझ प्रधानमन्त्री निवास वालुवाटार फर्केका हुन ।
वालुवाटारमा पनि उनी केही समय चिकित्सकको निगरानीमा रहनेछन् । अस्पतालवाट फर्कने क्रममा ओलीले सञ्चारमाध्यमलाई कुनै प्रतिक्रिया भने दिएनन् ।
अस्पताल भित्रबाट ह्विलचेयरमा बाहिर निकालिएका ओली हात हल्लाउँदै गाडी चढेर बिदा भएका थिए । सो अवसरमा अस्पतालमा उपप्रधानमन्त्री ईश्वर पोखरेल, परराष्ट्रमन्त्री प्रदीप ज्ञवाली, स्वास्थ्य तथा जनसंख्यामन्त्री भानुभक्त ढकाललगायत नेकपाका नेता तथा कार्यकर्ता अस्पताल पुगेका थिए ।
यस अघि दिउँसो पत्रकार सम्मेलन गदै अस्पतालले ओली पुर्ण रूपमा स्वस्थ्य रहेको जनाएको थियो ।
शिक्षण अस्पतालमा प्रधानमन्त्री ओलीको फागुन २१ गते मिर्गौला प्रत्यारोपण गरीएको थियो। अस्पतालमा प्रा.डा. प्रेमराज ज्ञवालीको नेतृत्वको टोलीले ओलीको मिर्गौला प्रत्यारोपण गरेका थिए।
प्रधानमन्त्री ओलीलाई भाञ्जी पर्ने समीक्षा संग्रौलाले मिर्गौला दिएकी थिइन्। समीक्षा भने केही दिन अघि नै डिस्चार्ज भइसकेकी छिन्।
