एजेन्सी – वेल्सका प्रिन्स चार्ल्सले कोरोना भाइरस संक्रमणको सतर्कता अपनाउँदै नमस्कार गरेको भिडियो यतिबेला सामाजिक सञ्जालमा भाइरल भएको छ ।
बुधबार लण्डनमा आयोजित एक अवार्ड कार्यक्रममा पुगेका प्रिन्स चार्ल्सले त्यहाँ उपस्थित सबैसँग हात मिलाउनुको सट्टा नमस्कार गरेका थिए ।
उक्त भिडियोमा ७१ वर्षीय प्रिन्स चार्ल्स गाडीबाट ओर्लिएर उपस्थित सबैलाई शुरुमा हात मिलाउन खोज्छन् तर फेरी झट्ट हात पछाडि सार्दै नमस्कार गर्छन् । उपस्थित सबैले पनि प्रिन्स चार्ल्सलाई केही अचम्मित बन्दै नमस्कार नै फर्काउँछन् ।
उक्त भिडियोमा प्रिन्स चार्ल्सले सेलिब्रेटीहरु रकर रुनी उड, रिचार्ड इ ग्रान्ट, अन्ना फ्रिल, पियर्स ब्रोसन लगायतलाई हात नमिलाई नमस्कार गरेको भिडियो सामाजिक सञ्जालमा भाईरल भएको छ ।
नेपाल र भारत लगायतका केही देशबाहेक अन्य देशमा नमस्कार गर्ने चलन नभएपनि विश्वव्यापी बन्दै गएको कोरोना भाइरस संक्रमणबाट बच्नका लागि हात नमिलाउनुस् भन्ने सचेतना फैलाइएका कारण उनले नमस्कार गरेको सहजै बुझ्न सकिन्छ ।
तर, हामी नेपाली हाम्रो संस्कार अनुसार नमस्कार गर्ने भएता पनि हामीले हात मिलाउने संस्कार बढावा दिन थालेका छौ । कोरोना संक्रमणबाट सतर्कता अपनाउन हात नमिलाऔं, नमस्कार गरौं भनेर प्रचारप्रसार भएपनि नेपालीहरु भने नमस्कार गर्नु भन्दा बढी हात नै मिलाउनमै ब्यस्त देखिन्छन । चलन नै नभएको देशका नागरिकले नै नमस्कार गर्न थालेपछि नेपालीले पनि यसबाट केही पाठ सिक्ने हो की ?
