गोरखा समाचारदाता
काठमाण्डौं – नेपाल प्रहरीले सर्जिकल सामग्री (ह्याण्ड स्यानिटाइजर) कालोबजारी गर्ने एकजना भारतीलाई पक्राउ गरेको छ ।
महानगरीय प्रहरी वृत्त जनसेवा न्यूरोडबाट खटिएको प्रहरी टोलीले ह्याण्ड स्यानिटाइजर कालोबजारी गरी बेच्ने प्रिया ट्रेडर्सका अनिल गुप्तालाई शुक्रबार साँझ पक्राउ गरेको हो ।
भारत घर भएका गुप्ताले काठमाण्डौ महानगरपालिका–२५ बाङ्गेमुडाको पसलबाट ह्याण्ड स्यानिटाइजर कालोबजारी गर्दै आएको आरोप लागेको छ । जनसेवा प्रहरीका प्रमुख, प्रहरी नायब उपरीक्षक सुनिलजङ्ग शाहले ११० पर्ने सामानलाई ३०० लिएर बेचेको सूचनाका आधारमा गुप्तालाई पक्राउ गरिएको जानकारी दिए ।
पक्राउ परेका गुप्ताको पसलबाट प्रहरीले बजार मूल्य २ लाख ५६ हजार ५२० रुपैयाँ पर्ने ८१४ थान ह्याण्ड स्यानिटाइजर बरामद गरेको छ ।
पक्राउ परेका गुप्तालाई कालोबजारीविरुद्ध मुद्दा चलाउने तयारी भइरहेको प्रहरीले जनाएको छ ।
