कैलासबावु श्रेष्ठ
गोरखा – गए राती मान्वुको धोरर्चेतमा जिप दुर्घटना हुदा १ जनाको ज्यान गएको छ । सवारी दुर्घटनामा परी अन्य ७ जना गंभिर घाईते भएका छन ।
धार्चे गाउँपालिकाको माछाखोलाबाट काशिगाउँ तर्फ जादै गरेको बा. १ च ५५०५ नम्बरको रातो प्लेटको जिप आरुघाट गाउँपालिका १ को धोरर्चेतमा दुर्घटना हुदा काशिगाउँका वडा सचिव किरण रिमालको घटना स्थलमा नै ज्यान गएको हो । घटनामा परी अन्य ७ जना गंभिर घाईते भएका छन । उनीहरु सबैलाई हेली मार्फत राजधानी लाने तयारी भई रहेको छ ।
जिप बुधबार राती काशिगाउँ तर्फ जादै गर्दा दुर्घटनामा परेको थियो । दुर्घटनामा परी धार्चे गाउँपालिकाकी उपाध्यक्ष फुलमायाँ गुरुङ, पालिकाका कर्मचारीहरु शर्मिला गुरुङ, निशा गुरुङ, धनबहादुर गुरुङ, क्यामेरा मेन केयरसिं गुरुङ, फेज नेपालका कर्मचारी सरोज नेपाल र चालक केरौजाका बालचन्द्र गुरुङ गंभिर घाईते भएका हुन ।
घाईते सबैको दोङचेतमा फेज नेपालद्वारा सञ्चालित क्लिनिकमा सामान्य उपचार भई रहेको छ । दुर्घटनामा परेका घाईतेहरुको टाउको तथा मेरुदण्डमा गंभिर चोट देखिएको उपचारमा संलग्न स्वास्थ्यकर्मीहरुले बताए ।
जिप कच्ची सडकबाट ३०० मिटर तल खसेर यार्सा खोलामा पुगेको उद्वारका लागि पुगेका नेपाल रेडक्रस सोसाईटी जिल्ला शाखाका सभापती भगवानबावु मास्केले टेलिफोन मार्फत जानकारी दिए ।
घाईते सबैलाई हेली मार्फत राजधानी लानका लागि अहिले गृहलाई पत्राचार भई सकेको गोरखामा प्रमुख जिल्ला अधिकारी सुरेन्द्र पौडेलले बताए । पौडेलका अनुसार घटना स्थल अति नै विकट भएका कारण हेली भन्दा अरु साधान बाट उद्वार गर्न नसकिने बताए ।
घटना बुधबार राती ७ः३० बजे भएको थियो । दुर्घटनामा परेका घाईतहरुले नै दुर्घटना स्थलबाट सडक सम्म आएर राती १०ः३० बजे प्रहरीलाई खबर गरेको जिल्ला प्रहरी कार्यालय गोरखामा प्रहरी उपरिक्षक ओमप्रसाद अधिकारीले बताए ।
घटना लगत्तै आरुघाट र मान्वुबाट प्रहरी निरिक्षक सहितको टोली राती नै घटना स्थल पुगेका थिए ।
तस्बिर भगवानबावु मास्के
