गोरखा समाचारदाता
काठमाण्डौं – वसन्तपुरमा चिर ठडयाइएको छ । सांस्कृतिक एवं परम्परागत फागु पर्व सुरु भएको संकेतको रुपमा चिर ठडयाउने गरिन्छ ।
फागुन शुक्ल अष्टमीका दिन शुभ साइत हेरी विधिवत रुपमा मयलको रूखलाई रङ्गीबिरङ्गी ध्वजा पताकाले सजाएर ‘चिर’ ठडयाएपछि फागु पर्व शुरुवात भएको मानिन्छ ।
राजधानीको बसन्तपुरमा रहेको हनुमान ढोका दरबारको दक्षिण पटाङ्गिनी, ऐतिहासिक मोहनकाजी चोक तथा दाखचोकमा विहान ७ः५७ बजेको साइतमा चीर ठडयाईएको हो ।
फागुन शुक्ल अष्टमीका दिन शुरु हुने उक्त पर्व फागु पूर्णिमासम्म मनाइन्छ । पूर्णिमाको राति चिर ढालेर त्यसलाई टुँडिखेल पुर्याएर दहन गरिन्छ । बसन्तपुरमा विधिवत रुपमा गाडिएको चीर ढालेपछि फागु पर्व सकिएको मान्ने परम्परा छ ।
यसवर्ष काठमाडौं उपत्यका लगायतका पहाडी जिल्लाहरुमा फागुन २६ गते सोमबार तथा तराईका जिल्लाहरुमा फागुन २७ मंगलबार फागु पर्व मनाइदैँछ । फागु पर्वलाई आपसी कटुताको अन्त्य र सद्भावबृद्धीको पर्वको रुपमा पनि लिने गरिन्छ ।
