गोरखा समाचारदाता
गोरखा – गोरखा सदरमुकाममा हालै निर्माण सम्पन्न भएको कृषि ज्ञान केन्द्र भवनको उदघाटन भएको छ ।
नव निर्मित भवनको प्रदेश स्तरीय भूमि ब्यवस्था कृषि तथा सहकारी मन्त्रालयका मन्त्री लेखबहादुर थापाले एक कार्यक्रम बिच उदघाट्न गरेको हो ।
मन्त्री थापाले भवनको रिबन काटेर उदघाट्न गर्दै प्रदेशको सबै जिल्लामा ज्ञान केन्द्र स्थापनाका लागि कर्मचारी अभाव भएको बताए । उनले संघबाट प्रदेश र प्रदेशबाट जिल्ला हुदै गाउँ सम्म जान कर्मचारी आफै हिचकिचाएकाले दिनानुदिन कर्मचारी अभाव हुदै गएको बताए ।
लक्ष्य अनुसार गण्डकी प्रदेशको ६ जिल्लामा केन्द्र स्थापना भई काम थालेको र अब ५ जिल्लामा केन्द्र स्थापनाको काम बाँकी भएको भन्दै कर्मचारी अभावकै कारण रोकिएको मन्त्री थापाले बताए ।
बि.स.२०७२ सालमा गोरखा भूकम्पले क्षति पुरयाएको भवन हालै पुनः निर्माण गरीएको हो । रविना डाँफे ड्रागन जे.भी.ले ३ करोड ७७ लाख ६ हजार ११६ रुपैयाँमा निमार्ण सम्पन्न गरेको हो । ७६४ं.५२ बर्ग मिटरमा फैलिएको उत्त भवन ३ तलामा १८ कोठा रहेको छ ।
उदघाट्न कार्यक्रममा जिल्ला समन्वय समितिका उप प्रमुख जनुका अधिकारी, गोरखा नगरपालिकाका मेयर राजनराज पन्त, नेपाल पत्रकार महासंघका उपाध्यक्ष दिपक श्रेष्ठ, सिताके च्याउका प्रशिक्षक सिताबहादुर गुरुङ्ग र शहरी विकास तथा डिभिजन कार्यालय जिल्ला आयोजना कार्यान्वयन इकाई गोरखाकी प्रमुख सुनिता श्रेष्ठ लगायतले मन्तब्य राखेका थिए ।
