गोरखा समाचारदाता
गोरखा – गोरखाको नामजुङमा बिहीबार राती लुटपाट भएको छ । घरमा पाहुना बन्न आएकाहरुले खानेकुरामा वेहोश हुने औषधी हालेर खुवाएको र त्यही चिज खादा बेहोस भए पछि लुटपाट गरीएको अनुमान गरीएको छ ।
जिल्लाको शहिद लखन गाउँपालिका वडा नम्बर ९ नामजुङको बाँझोगह्रामा बस्दै आएकी जिरा बरामको परिवारलाई लुटेरा समूहले लक्षित गरी घटना गराएको प्रहरीले जानकारी दिएको छ ।
अपरिचत ब्यक्तिहरुको ३/४ जनाको समूहमा आएका ब्यक्तिहरुले घरमा रहेका सासु, बुहारी र नातिलाई जुसमा बेहोस हुने पदार्थ हालेर खुवाएको र त्यही खादा घरका सबै वेहोश भए पछि लुटेराले लुटापाट गरी वेपत्ता भएको जिरा बरामले बताईन ।
नचिनेको मानिसहरुको समुहले ६० बर्षिय जिरा बराम, उहाँकी २८ बर्षिया बुहारी जमुना बराम र ८ बर्षका नाति चुक्थान बरामलाई बेहोश बनाएर घरमा भएको गरगहना लुटपाट गरेको वडाध्यक्ष रामप्रसाद लामिछानेले बताए ।
लुटेराहरुको समूहले घरमा रहेका तिनै जनालाई पाइनापल नामको जुस खुवाएका थिए । उनीहरुले १ तोलाको सुनको सादा रिङ, सुनको तिलहरी, औठी र मोवाईलका साथै केही नगद समेत लुटेर लगेको अनुमान गरीएको छ ।
एकान्त स्थानमा रहेको बरामको घरमा शुक्रबार बिहान ९ बजे सम्म पनि घरका मानिस नदेखिए पछि स्थानियले हेर्न जादा जिरा बराम वेहोश वस्थामा देखिए पछि गाउँलेलाई खबर गरी प्रहरीलाई जानकारी दिएका थिए ।
बिरामीहरु सबैको अहिले गोरखा अस्पतालमा उपचार भई रहेको छ । पिडित जिराका अनुसार लुटुराहरुको समूहले बुधबार देखी नै घरमा बसी मासु खाना खाएका थिए । मासु भने लुटेरा समूहले नै ल्याएका थिए । समूहका केही मानिसले घरवेटीलाई मासु खान आग्रह गर्दा नमाने पछि जुस पिउन दिएका थिए ।
घटनाको बारेमा जानकारी पाए लगत्तै प्रहरी घटनास्थल पुगेको थियो । घटका विषयमा गहन अध्ययन र अनुसन्धान भई रहेको जिल्ला प्रहरी कार्यालय गोरखाले जनाकारी दिएको छ ।
