कैलासबावु श्रेष्ठ
गोरखा — गोरखाको बारपाकमा निर्माण भई रहेको भूकम्प स्मृति पार्क निर्माणमा ढिलाई भएको छ ।
०७२ सालमा गएको बिनाशकारी भूकम्पको केन्द्रविन्दु वारपाकमा निर्माणाधीन भूकम्प स्मृति पार्कको अहिले ५५ प्रतिशत मात्र काम सकिएको हो ।
पार्क यसै आर्थिक बर्षको जेष्ठ मसान्त सम्ममा निर्माण सम्पन्न भई सक्नु पर्ने छ ।स्मृती पार्क सम्म पुग्ने पिच र भवन वरपर गएको पहिरो पन्छाउने काम भई रहेकोले केही समय ढिला हुन गएको पुनर्निर्माण प्राधिकरण अन्तर्गत जिल्ला आयोजना कार्यान्वयन इकाइ गोरखा का आयोजना प्रमुख सुनिता श्रेष्ठले बताईन ।
अहिले सम्म लाप्राक जाने बाटोबाट स्मृती पार्क सम्मको पहुच मार्ग, पहुच मार्गमा ग्रावेल गर्ने काम, आरसिसी स्टक्चर निर्माण सम्पन्न भई सकेको छ । अब भने आरसिसी स्टक्चर माथि स्टिल ट्रस राख्ने काम, छानाको माथि ग्लोब राख्ने काम र आरसिसी स्टक्चर भित्र मण्डलला बनाउने काम बाँकी रहेको छ ।
आयोजनाले २०७२ वैशाख १२ मा ज्यान गुमाएकाको सम्झनामा पार्क बनाउन लागेको हो । पार्क निर्माणका लागि १३ करोड ७ लाख १५ हजारमा स्वच्छन्दरहोम निर्माण जेभी संग सम्झौता भएको थियो ।
पार्क २ सय १६ रोपनी जग्गामा फैलिएको छ । स्मृती भवन भित्र भूकम्पमा ज्यान गुमाउने १४ जिल्लाका मानिसहरुको नामावली सहितिको शिलालेख रहने छ । मुख्य स्तम्भ संगै सुविधा सम्पन्न शौचालय, चमेनागृह र पार्किङस्थल निर्माण भई सकेको छ भने पार्कको आकर्षणको लागि बगैंचा बनाउने काम सुरु भएको छ ।
२०७४ मंसिर १४ मा ठेक्का सम्झौता भएर काम सुरु भएको पार्कको निर्माण यसै आर्थिक बर्षको जेष्ठ मसान्त भित्र सम्पन्न गरी सक्नु पर्ने छ । पार्क निर्माण पछि बारपाकमा पर्यटक आवागमनमा वृद्घि हुने विश्वास गरीएको छ ।
पार्क निर्माणका बिषयमा सरोकारवालाहरुले अनुगमन समेत सम्पन्न गरेको थियो ।
