गाेरखा समाचारदाता
गाेरखा – सुर्खेतमा शुक्रबार मृत फेला परेका गाईगोरुका सम्बन्धमा गृहमन्त्रालयले जाँज गर्न छानविन समिति गठन गरेको छ
गृह मन्त्रालयका उपसचिव सागरमणि पाठकको संयोजकत्वमा छानविन समिती गठन गरीएकाे हाे । समितिले १५ दिन भित्र प्रतिवेदन पेश गर्ने छ । सुरक्षा निकायका प्रनिनिधि समेत रहने गरी ४ सदस्यीय समिति गठन गरिएको गृहमन्त्रालयबाट शनिवार जारी विज्ञप्तिमा उल्लेख छ ।
मन्त्रालयले जारी गरेकाे विज्ञप्तिमा गौ हत्या जस्तो गम्भीर अपराधमा संलग्न व्यक्तिलाई कानुन बमोजिमको हदैसम्मको कारबाही गरिने र कुनै किमिसको उन्मुक्ति नदिने कुरामा गृहमन्त्रालय प्रतिवद्ध रहेको विज्ञप्तिमा उल्लेख छ ।
यसैबीच हिजै नेपालगन्ज उप महानगरपालिकाले दैलेखको श्रीस्थानमा लैजाने भन्दै ट्रकमा लोड गरी ल्याइ सुर्खेतको जंगलमा बेवारिसे अवस्थामा छाडिएका १ सय ४४ वटा गाईलाई पुनः नेपालगन्ज फिर्ता पठाइएको छ ।
नेपालगन्जबाट ८ वटा ट्रकमा ल्याइएका मध्ये १६ वटा वीरेन्द्रनगरको कटकुवा र ८ वटा धुलिया विटको व्युरेनी जंगलमा गरी कूल २४ वटा मृत अवस्थामा शुक्रवार फेला परेका थिए ।
प्रहरीका अनुसार शनिवार विहान १ सय ४४ वटा गाईलाई पुनः नेपालगन्ज फिर्ता पठाइएको छ । डिआईजी पूर्णचन्द्र जोशीले जीवित फेला परेका गाईहरुलाई शनिवार ट्रकमा राखेर नेपालगन्ज फिर्ता पठाइएको बताए ।
उनले शनिवार पनि सुर्खेतका जंगलहरुमा खोजी गर्दा थप आठ वटा मृत गाई फेला परेको समेत जानकारी दिए । घाइते अवस्थामा रहेका गाईहरुको शनिवार मृत्यु भएको र ती समेत गणना गर्दा ३२ वटा पुगेकाे छ ।
ट्रकमा लोड गरिएका गाईहरुलाई दैलेखको श्रीस्थान लाने भनिएपनि सुर्खेतको जंगल क्षेत्रबाट छोडाउँदै आएको पाइएको छ । सुरुमा कटकुवा क्षेत्रमा मृत गाईसहित अन्य बेवारिसे गाईहरु रहेपनि खोजी गर्दै जाँदा व्युरेनी क्षेत्रमा पनि मृत र घाइते गाईबाच्छीहरु फेला परेका थिए ।
सुर्खेतको धुलियाविट प्रहरी चेकपोष्टमा ८ वटा ट्रकमा २ सय ९१ गाईबाच्छा भएको इन्ट्री गरिए पनि नेपालगन्ज उपमहानगरपालिकाले चालकहरुलाई दिएको पत्रमा ३ सय ७० वटा रहेको उल्लेख छ । सुर्खेत प्रहरीले शुक्रवार नै गाई लोड गरी ल्याइएका मध्ये पाँच वटा ट्रक र त्यसका चालकहरुलाई नियन्त्रणमा लिएर अनुसन्धान थालिसकेको प्रहरीले जनाएकाे छ ।
नेपालगन्ज उपमहानगरपालिकाले दैलेखको श्रीस्थानमा लैजानका लागि गाई लगिएको बताए पनि श्रीथानबासी तथा जिल्ला प्रशासन कार्यालय दैलेले यसवारे कुनै जानकारी नभएको जनाएको छ । दैलेखका प्रमुख जिल्ला अधिकारी युवराज कटेलले दैलेखका स्थानीय तहसंग नेपालगञ्ज उपमहानगरपालिकाले समन्वय नै नगरेको बताए।
श्रीस्थानको भैरवी गाउँपालिकाका अध्यक्ष प्रेम बुढाले हचुवाका भरमा नेपालगन्जका गाई श्रीस्थान ल्याउन लागेको बताए । नेपालगन्ज उपमहानगरले को संग सहमति गरी गाई ल्याउन लागेको हो, त्यसवारे कसैलाई जानकारी नै छैन भन्दै उपमहानगरपालिकाले झुटो प्रचार गरेको आरोप लगाए ।
श्रीस्थान मन्दिर व्यवस्थापन समितिले पनि श्रीस्थानमा नेपालगन्ज उपमहानगरपालिकाबाट गाई ल्याउनेवारे कुनै आधिकारिक जानकारी नआएको जनाएको छ । समितिका कार्यवाहक अध्यक्ष केशवराज थापा र महन्त गोकर्णनाथ योगीले संयुक्तरुपमा विज्ञप्ति जारी गरी श्रीस्थान ज्वाला क्षेत्रको बदनाम हुने गरी गरिएको कुप्रचारप्रति आपत्ति जनाएको छ । साथै घटनामा संलग्नलाई कारबाही गर्न समितिले माग गरेको छ ।
यसै बिच सामूहिक गौहत्याको विरोधमा सुर्खेतमा सनिबार प्रदर्शन गरिएको छ । सुर्खेत उद्योग बाणिज्य संघको इलेक्ट्रोनिक बस्तुगत समितिको आयोजनामा शनिवार विहान वीरेन्द्रनगरमा प्रदर्शन गर्दै सामूहिक गौहत्यामा संलग्नलाई कारबाहीको माग गरिएको छ ।
फौजदारी संहिता २०७४ को परिच्छेद २७ मा पशुपंक्षी सम्वन्धी कसुरमा गाई गोरु मार्न वा कुट्न नहुने उल्लेख छ । यदि कसैले गाई गोरु मार्ने वा कुनै नियतले चोट पुर्याउने गरेमा त्यस्तो कसुर गर्ने व्यक्तिलाई ३ बर्षसम्म कैद, अंगभंग पारेमा ६ महिनासम्म कैद र अन्य चोट पुर्याएमा ५० हजार रुपियाँसम्म जरिवाना हुने कानुनी व्यवस्था छ ।
