गाेरखा समाचारदाता
गाेरखा – गोरखामा थप ४ हजार डकर्मी उत्पादन भएका छन् । भूकम्प प्रतिरोधी घर निर्माणका लागि सरकारी तथा गैरसरकारी क्षेत्रबाट जिल्लामा हजारौं दक्ष जनशक्ति तयार गरिएको छ ।
यसै बीच पुर्ननिर्माणको काममा सामाजिक प्राविधिक सहजिकरण गर्दै आएको भारत सरकारबाट सहयोग प्राप्त नेपाल आवास पुनर्निर्माण परियोजना मात्र ४ हजार जनालाई दक्ष डकर्मी तालिम दिएको हो ।
परियोजनाले भुकम्प पश्चात निर्माणाधीन घरमै गएर मिस्त्रीलाई सो तालिम दिइने गरेको जनाएको छ । गोरखा तथा पालुङटार नगरपालिका र अजिरकोट, आरुघाट, गण्डकी, शहिदलखन, सिरानचोक एवम् धार्चे गाँउपालिकामा २ सय ४० महिला तालिम प्राप्त दक्ष डकर्मी सहित सो संख्यामा तालिम दिइएको परियोजनाले बताएको छ ।
‘तालिममा धेरै महिलाहरु पनि सहभागी हुनुभएको छ ’ परियोजनाका वरिष्ठ इन्जिनियर सन्तोष लामाले भने ‘कतिपय वषौं देखि काम गरिरहनुभएका पुरुष पनि हुनहुन्छ । त्यसले उहाँको दक्षता र क्षमता पनि वृद्धि भएको छ ।’ तालिम लिएकाहरुलाई घर निर्मााण गर्ने आत्मविश्वस बढेको छ ।
‘भूकम्पले भत्काउन नसक्ने बलियो घर कसरी बनाउने रहेछ भनेर थाहा पाइयो’ गोरखा नगरपालिका वडा नम्बर ३ नारेश्वरकी २८ बर्षीय सम्झना सुनार भनिन् ‘तालिमले बलियो तथा सुरक्षित घर निर्माण गर्ने बारे जानकारी दिनुका साथै पुरुष मिस्त्री सरह काम गर्ने अवसर प्राप्त भएका छ, हामी खुसि छौं ।’
उनले तालिम लिन चाहने अन्य महिलाहरुलाई समेत जानकारी दिएर आउन प्रोत्साहन गर्ने गरेको बताइन् । परियोजनाका वरिष्ठ इन्जिनियर लामाका अनुसार भुकम्प पश्चात घर निर्माण गरिरहेका मिस्त्रीलाई नै सुरक्षित आवास निर्माणका लागि प्रशिक्षित गराउनु तालिमको मुख्य उद्देश्य रहेको छ ।
तालिममा विशेष गरी राष्ट्रिय भवन निर्माण संहिता अनुसार ढुङ्गा माटो, इटाको गारो, सुधारात्मक विधि, प्रबलिकरण, वैकल्पिक प्रविधिबाट बन्ने घर लगायतमा विभिन्न ढाँचामा सिकाउने गरिएको लामा बताँउछन् । तालिम पश्चात सुरक्षित आवास निर्माण सम्बन्धी सचेतना बढेको परियोजनाका इन्जिनियर दिवस दाहालको भनाई छ ।